وزیراعظم نا خصوصی کمکار امور نوجواناں عثمان ڈار نا نجی ٹی وی چینل تون گپ وتران

اسلام آباد ۔ 06نومبر (اے پی پی) وزیراعظم نا خصوصی کمکار امور نوجواناں عثمان ڈار پارینے کہ تحریک انصاف وڈی خوری نا بابت تینا بنداوی فلسفہ آن انحراف کپک، اومیت ءِ دھرنہ ٹی بشخ ہلوک آک بروک آ جمعہ نا نماز ءِ تینا علاقہ غاتے ٹی خوانرہ، حکومت جمعیت علمائے اسلام (ف) انا غیر آئینی خواست ءِ امنا کپک ، حکومت جے یو آئی (ف) انا راہشون مولانا فضل الرحمان نا کنڈآن بنجائی دارالحکومت اٹی تروک آ دھرنہ نا چٹفنگ کن پرعزم ءِ ۔ اسہ نجی ٹی وی چینل اسے تون گپ و تران کرسا عثمان ڈار پیدوار کرے کہ پی ٹی آئی نا حکومت حزب اختلاف نا اسہ ہم غیر آئینی و غیر جمہوری خواست اسے امنا کپک ولے اوفتا کانودی خواست آتے امنا کننگ مریک ۔ اومستی پارے کہ وزیراعظم عمران خان نا استیفہ نا خواست ءِ ہچ ءُ حالیت اسے ٹی امنا کننگپک ۔ اوپارے کہ پرامن برانز ہر سیاسی جماعت نا آئینی حق ءِ اوجے یو آئی (ف) انا راہشون مولانا فضل الرحمان آ زور شاغا کہ او حکومت نا مون آ تینا آئینی خواست آتے تخے تانکہ اوفتا ویل آتے ایسر کننگ مرے ۔ اوپارے کہ آزادی مارچ اٹی بشخ ہلوک آک بدامنی و افراتفری خوارہ ولے عمران خان نا حکومت دھرنہ نا پرامن خاتمہ ءِ خواہک ۔ اوگمان ظاہر کرے کہ آزادی مارچ اٹی اوار بندغ آک زوت ہی پرامن وڑاٹ تینا باوہ پیرہ ہی آ علاقہ غاتیا رادہ مریرہ ۔ اواومیت ظاہر کرے کہ دھرنہ ٹی بشخ ہلوک آک بروک آ جمعہ نا نماز ءِ تینا شارتیٹی خوانرہ انتئے کہ مولانا فضل الرحمان ءِ حالیت آتا اندازہ ارے و او تینا غیر جمہوری خواست آتیان ہم بلد ءِ ۔ عثمان ڈار پارے کہ انتشار نا سیاست ملک انا فائدہ ٹی اف و غٹ جمہوری ویل آتا ایسر جمہوری وڑاٹ ہی بایدے مرے ۔ اوپارے کہ حکومت و اپوزیشن نا مذاکراتی کمیٹیک رابطہ ٹی ءُ و گمان ءِ کہ او جوان وڑاٹ دا ویل انا ایسری اس پٹرہ ۔ اوپارے کہ پی ٹی آئی اپوزیشن تون سیاسی جنگ و جھیڑہ نا خواہش مند اف ۔ ولے او وڈی خوری نا بابت او تینا پارٹی نا بنداوی فلسفہ آن انحراف کپک ۔