اقوام متحدہ ٹی پاکستان نا آخبتی مندوب منیر اکرم اقوام متحدہ نا سیکرٹری جنرل ءِ تینا سفارتی سند آتے پیش کریر

اسلام آباد ۔ 06نومبر (اے پی پی) اقوام متحدہ ٹی پاکستان نا آخبتی مندوب منیر اکرم اقوام متحدہ نا سیکرٹری جنرل انتونیوگوترش ءِ تینا سفارتی سند آتے پیش کرے ۔ پاکستان نا پوسکن آ آخبتی مندوب ءِ بخیر اٹ پارسا سیکرٹری جنرل پارے کہ پاکستان نا اقوام متحدہ نا نظام کار اٹی اہم کڑد ادا کننگ ءِ وپاکستان نا پوسکن آ آخبتی مندوب ءِ بخیر کرسا اودے خوشی مسنے ۔ انٹونیوگوترش پارے کہ پناہ گزین آتے کن ہائی کمشنر نا زمواری تیٹی اونا پاکستان تون خصوصی تعلقداری قائم مس و اودے اومیت ءِ کہ منیر اکرم پاکستان و اقوام متحدہ نا نیام اٹ مثالی تعلقداری تے مون آ دننگ اٹ تینا کڑد ءِ جوان وڑاٹ ادا کیک ۔ منیر اکرم داکان مست 2002ء آن ہلیس 2008 ء اسکان ہندا عہدہ غا کاریم کرینے ، داکان بیدس او چندی ملک آتے ٹی پاکستان نا سفیر نا حیثیت اٹ ہم زمواری تے پورو کرینے ۔ او اِرا وار سلامتی کونسل نا صدر ہم رہینگانے ۔ داکان بیدس او اقوام متحدہ نا اقتصادی و راجی کونسل نا صدر و گروپ 77 پلس چین نا چیئرمین ہم رہینگانے ۔