صدر مملکت ڈاکٹر عارف علوی نا سونمیانی سم کاری رینج اٹی پاک فضائیہ نا جنگی جہاز آتا فائر پاور نا درشانی نا وخت آ دود آن تران

اسلام آباد ۔ 06نومبر (اے پی پی) صدر مملکت ڈاکٹر عارف علوی پارینے کہ پاکستان نا سلہہ بند فوج وطن عزیز نا دفاع کن پورو تیار ءُ، ملکی دفاع ، سالمیت و وتواجہی آ ہچ ءُ سمجھوتہ اس کپنہ، پاک فضائیہ خودانحصاری آ یخین تخک، جے ایف 17 تھنڈر ننا گمر نا قابل میرات ءِ ، کسبی قابلیت ، چاہنداری و بہادری ٹی پاک فضائیہ نا ہچ ءُ مقابلہ اس اف ۔ چارشنبے نادے آ داڑے پاک فضائیہ نا جنگی جہاز آتا سونمیانی سم کاری رینج اٹی فائر پاور نا درشانی ءِ کننگ نا وخت آ اڈ ہلوک آ دود آن تران کرسا صدر مملکت پارے کہ زبردست دود انا اڈتننگ آ پاک فضائیہ نا سروک ءِ مبارکبادی پیش کیوہ ۔ اوپارے کہ پاکستان نا سلہہ بند فوج وطن عزیز نا دفاع کن پوروتیار ءِ ۔ ملکی دفاع، سالمیت و وتواجہی آ ہچ ءُ سمجھوتہ اس کپنہ ۔ اوپارے کہ ملکی فضائیہ سیم تا نگہبانی ٹی پاک فضائیہ نا کلیدی کڑد اسے و پاک فضائیہ نا ہچ کس مقابل اف ۔ صدر مملکت پارے کہ جے ایف 17 تھنڈر جہاز ننا میرات ءِ ۔ اوپارے کہ بھارت تون ساڑی آ فضائی جھڑپ اٹی پاک فضائیہ نا سرسہب کارروائی علاقہ نا فضاء ءِ بدل کرینے ۔ اوپارے کہ ڈیہہ نا ملک آک پاک فضائیہ نا لاءخی تے امنا کرینو ۔ صدر مملکت پارے کہ پاکستان ہمسایہ ملک آتون گچین تعلقداری خواہک ۔ اوپارے کہ مچ آ دنیا بھارتی جارحیت نا مقابلہ ٹی پاکستان نا ردعمل نا ستاءِ کرینو، جہانی برادری آ زور شاغا کہ او مقبوضہ کشمیر اٹی انسانی حق انا خلاف ورزی و کرفیو نا نوٹس ءِ ہلے، حق خودارادیت کشمیری تا بنداوی و پیدائشی حق ءِ ۔ صدر مملکت کامرہ ٹی ایوی ایشن سٹی نا جوڑ کننگ نا ڈٹ انا ستاءِ کرے ۔ سونمیانی سم کاری رینج اٹی پاک فضائیہ نا جنگی جہاز آک برق رفتاری نا درشانی ءِ کرسا تینا ہدف آتے سرسہبی اٹ نشانہ کریر ۔ داوخت آ پاک فضائیہ نا سروک و فضائیہ نا بڑزکو آفیسر آک ہم ساڑی ئسر ۔