وزیراعظم عمران خان نا مسہ دے ئی ہفت می ایشیائی علاقائی کنزرویشن کانفرنس نا بنائی سیشن آن تران

اسلام آباد ۔ 06نومبر (اے پی پی) وزیراعظم عمران خان پارینے کہ مستین نا اسہ حکومت اس ہم چاگڑدی بدلی تا بابت گڑتی ظاہر کتنے، اولیکو حکومت ءِ ہرا چاگڑدی بدلی تا توننگ کن پبی گام گیج چست کرینے، شارتے تالان مننگ نا جاگہ غا نن کثیر المنزلہ ماڑی تا تفنگ نا کنڈا کانہ، حکومت اٹی بننگ آن مست کنا دا عزم ئس کہ اقتدار اٹی برسا چاگڑدی بدلی اولیت مریک، ہنداسوب ءِ کہ خیبر پختونخوا ٹی 2013ء ٹی حکومت اٹی بننگ آن پد نن بلین ٹری ڈٹ انا بناءِ کرین، دا ڈٹ انا بناٹی معلوم مس کہ ٹمبر مافیا اسہ بھلو ویل اسے ہراڑا ہچ ءُ روک رکاوٹ اس اف، 10 گارڈ دامافیا تا دوٹی خلنگار، تدوک آ 10 سال اٹی لاہور اٹی 70 درسد درخت آتے کاٹ کننگا، ہندا سوب ءِ کہ لاہور کچٹ انگا شار ءِ ۔ چارشنبے نادے آ اسلام آباد اٹی مسہ دے ئی ہفت می ایشیائی علاقائی کنزرویشن کانفرنس نا بنائی سیشن آن تران کرسا وزیراعظم پارے کہ غٹ مذہب آک انسانیت نا راجی آسراتی نا سبخ ایترہ ۔ پاکستان اٹی بڑز و بالا مش، مریس کرک و جنگلات آک ءُ ، ای ہمو خوش قسمت پاکستانی تیٹی اوار اُٹ ہرا پاکستان نا غٹ علاقہ غاتے خنانو ۔ اوپارے کہ شارتیٹی رہینگوک آ زیات تر پاکستانی پاکستان نا قدرتی خوبصورتی ءِ خنپسہ، ننے آخبت نا چین تا احساس ءِ کرسا فیصلہ کروئی مریک ۔ پاکستان قدرتی خوبصورتی و وسیلہ غاتیان مالامال ملک اسے ۔ اوپارے کہ ہراتم ای ودی مسٹ تو پاکستان نا آبادی 4کروڑ ئس اینو 22کروڑ ءِ ۔ اوپارے کہ اولیکو وار حکومت اس بھلو کچ اسے آ چاگڑدی رکھ اکن گام گیج کرینے ۔ خیبر پختونخوا ٹی بلین ٹری سونامی ڈٹ اٹی ہندی آبادی ءِ ہم اوار کننگا، ہندا دا ڈٹ انا سرسہبی نا فارمولائس، خیبر پختونخوا ٹی دا ڈٹ انا رداٹ انفراسٹرکچرجوڑ کننگا داڑے نرسری جوڑ کننگا ۔ الس نا اوار مننگ آن پد دا ڈٹ ءِ حتمی دروشم اس تننگا ۔ اوپارے کہ خیبر پختونخوا ٹی ٹمبر مافیا نا دروشم اٹ بھلو چیلنج مون تروک ءِ ، نن دا ٹمبر مافیا غان خلاصی کن گام گیج کرین، ننے معلوم مس کہ 10 گارڈ ٹمبر مافیا نا برخلاف جہد اٹی تینا جان تے ندر کرینو، نن چاگڑدی کچٹی ءِ مون آ تخسا 10 ارب درخت خلنگ نا قومی ڈٹ انا بناءِ کرینن، پاکستان نا آبادی نا 60 درسد ورناتیا تالان ءِ ، اوفتے دا کنڈا چکسا دا ڈٹ ءِ سرسہب کننگ مریک، چناتے چاگڑدی کچٹی آن آگاہی کن دادے نصاب نا بشخ جوڑ کننگ اُن انتئے کہ ماحولیات نا رکھ ہی اوفتا گچین آخبت ءِ ۔ وزیراعظم کانفرنس اٹی بشخ ہلوک آتا ستاءِ کرسا اومیت ظاہر کرے کہ چاگڑدی کچٹی نا توننگ کن دا کانفرنس سودمند ثابت مریک ۔