اسلام آباد ۔ 05نومبر (اے پی پی) خواجہ نبی پاک ﷺ نا ودی دے انا چرجوئی ٹی جہانی رحمت اللعالمین کانفرنس یک شنبے نادے آ 10 نومبر آ بنجائی دارالحکومت اسلام آباد اٹی مریک، اینخو نا سال کانفرنس نا سرحال ’’ریاست مدینہ و جدید اسلامی ریاست نا تصور تعلیمات نبوی ﷺ نا روشنی ٹی ‘‘ تخنگانے ۔ وزارت مذہبی امور کانفرنس نا اڈتننگ کن غٹ بست و بند آتے حتمی دروشم تسنے ۔ کانفرنس نا سرحال نا رداٹ مچ آ ملک انا یونیورسٹی، کالج، دینی مدرسہ ، عالم دین و مشاءخ آک پٹ وپولی مقالہ غاتے مقابلہ کن گدریفینو ۔ داکان بیدس سیرت و نعت رسول مقبول ﷺ آ ہم قومی و علاقائی زبان تیٹی کتاب آتے ہم مقابلہ ٹی اوار کننگانے ہرافتیا اول، دوم و سوم بروک آتے انعام تننگک ۔ کانفرنس نا بنائی سیشن نا کماشی ءِ وزیراعظم عمران خان وخت اس کہ صدر مملکت ڈاکٹر عارف علوی ایسری سیشن نا کماشی ءِ کیک ۔ کانفرنس اٹی مچ آ ملک انا شخصیت آک ، عالم دینک ، مشاءخ عظام و اسکالر آتے سلہ خلنگ انگ ءِ ۔ وزارت مذہبی امور نا رداٹ اینخو نا سال کانفرنس اٹی سعودی عرب، ایران، مصر ، عمان، عراق، تیونس و شام آن عالم دین و ڈل آتے بٹنگ انگانے ۔ داکان بیدس خصوصی وڑاٹ جامع الازہر و مدینہ یونیورسٹی نا پروفیسرز و مسجد اقصیٰ نا خطیب ءِ ہم کانفرنس اٹی بشخ ہلنگ کن خصوصی وڑاٹ دعوت نامہ اس مون تننگانے ۔
