امریکی محکمہ خارجہ نا سالانہ رپورٹ اٹی حقی حالیت و دہشت گردی نا برخلاف پاکستان نا قربانی تے گوجالنگانے، ترجمان دفترخارجہ

اسلام آباد ۔ 05نومبر (اے پی پی) پاکستان دہشت گردی نا بابت امریکی محکمہ خارجہ نا سالانہ رپورٹ 2018ء آ مایوسی نا درشانی ءِ کرسا پارینے کہ دارپورٹ اٹی حقی حالیت و دہشت گردی نا برخلاف پاکستان نا قربانی تے گوجالنگانے ۔ دفترخارجہ نا ترجمان سے شنبے نادے آ داڑے جاری بیان اٹی پارینے کہ رپورٹ اٹی ڈغاری راستکی و دہشت گردی نا برخلاف اِرا عشرہ غان زیات جہد اٹی پاکستان نا بھلا قربانی تے پورو وڑاٹ گوجالنگانے ۔ ترجمان پارے کہ پاکستان نا کوشست آتیان نئے بیرہ ڈیہہ آن القائدہ چٹا بلکن دنیا ءِ رکھ کننگ اٹ ہم کمک رسینگا ۔ پاکستان دہشت گردی نا برخلاف نیشنل ایکشن پلان نا رداٹ پبی گام گیج کن پرعزم ءِ ۔ ترجمان دفترخارجہ پارے کہ سلامتی کونسل نا قرارداد نمبر 1267نا رداٹ پاکستان تینا زمواری تے پورو کننگ نا رداٹ مخصوص تنظیم، پڑک و بندغ آتیا پابندی، اوفتا میرات آتے منجمد کننگ و اوفتا مالی وسیلہ غاتے منقطع کننگ کن جامع کانودی و انتظامی گام گیج کرینے، داکان بیدس پاکستان فنانشل ایکشن ٹاسک فورس(ایف اے ٹی ایف) ایکشن پلان نا گچین اطلاق کن ہم گام گیج آتے برجاتخانے ۔ ترجمان پارے کہ دا رپورٹ اٹی ہم پاننگانے کہ پاکستان ءِ تحریک طالبان پاکستان، جے یو اے، اسلامک سٹیٹ خراسان و ایلو دہشت گرد گروپ آتیان دہشت گردی نا جلہو آتا خطرہ ءِ ولے دا رپورٹ اٹی داہیت ءِ اوار کننگتنے کہ دا گروپ آک سیم آن ایپار آن پاکستان اٹی دہشت گردی نا جلہو آتے برجاتخانو ۔ ڈیہہ و دنیا ٹی امن و سوگوی کن پاکستان نا کوشست آتا ذکر ءِ کرسا ترجمان پارے کہ پاکستان نیک نیتی اتون اوغانستان اٹی امن و خیر خواہی نا رداٹ امریکہ و طالبان تا نیام اٹ براہ راست مذاکرات اٹی کمکاری کرے ۔ دابابت آن پاکستان نا مثبت کڑد انا امریکہ و امریکی سرکڑدہ غاتون اوار وسیع کہول آ اعتراف ءِ کننگا، دانا برعکس ہچ ءُ منفی و ناخوشگوار تاثر بے سوب و ہڑتوم آ ملک آتا تین پہ تینی تعلقداری ٹی گمانی مثبت پیش رفت آن عدم مطابقت آ مبنی ءِ ۔ ترجمان پارے کہ پاکستان مدام تعمیری سرجز و تعامل نا کمک اٹ انسداد دہشت گردی نا کوشست آتے مون آ دننگ نا گرج آ زور شاغانے ۔ ترجمان اومیت ظاہر کرینے کہ پاکستان نا عزم ، خذمت و قربانی تا پورو وڑاٹ اعتراف مریک و اوفتا درست رداٹ ستاءِ کننگک ۔