اسلام آباد ۔ 05نومبر (اے پی پی) وزیراعظم نا خصوصی کمکار حوالکاری و شین کاری فردوس عاشق اعوان پارینے کہ سوالی تے انصاف نا فراوانی ٹی بار و بنچ انا اہم ءُ کڑد اسے، ضلعی عدالت آتا حال و زار و ویل آتے وزیراعظم نا نوٹس اٹی ایسونٹ، اسلام آباد نا ضلعی عدالت آک جوڈیشل کمپلیکس اٹی منتقل مریرہ، وکیل آتا ویل آتا ایسری کن خصوصی کمیٹی اس جوڑ کننگ …
وزیراعظم نا خصوصی کمکار حوالکاری و شین کاری فردوس عاشق اعوان نا اسلام آباد ہائی کورٹ نا پیشن میڈیا تون گپ و تران
گیشتریں ھال
اسلام آباد ۔ 05نومبر (اے پی پی) وزیراعظم نا خصوصی کمکار حوالکاری و شین کاری فردوس عاشق اعوان پارینے کہ سوالی تے انصاف نا فراوانی ٹی بار و بنچ انا اہم ءُ کڑد اسے، ضلعی عدالت آتا حال و زار و ویل آتے وزیراعظم نا نوٹس اٹی ایسونٹ، اسلام آباد نا ضلعی عدالت آک جوڈیشل کمپلیکس اٹی منتقل مریرہ، وکیل آتا ویل آتا ایسری کن خصوصی کمیٹی اس جوڑ کننگ انگ ءِ، مولانا فضل الرحمان ہربال آ چکا خلنگ خواہک ولے اونا آءوٹ مننگ نا گمان زیات ءِ ۔ داخیال آتا درشانی ءِ او سے شنبے نادے آ ہائی کورٹ نا پیشن میڈیا تون گپ و تران کرسا کرے ۔ خصوصی کمکار پارے کہ چیف جسٹس اسلام آباد ہائی کورٹ اطہر من اللہ نا منت وار اُٹ کہ او ڈسٹرکٹ کورٹ اسلام آباد نا جاچ ءِ ہلنگ نا موقع تس ۔ ڈسٹرکٹ نا حال و زار و ویل آتے وزیراعظم نا نوٹس اٹی ایسونٹ ۔ اوپارے کہ اسلام آباد نا ضلعی عدالت آک جوڈیشل کمپلیکس اٹی منتقل مریرہ ۔ وزیراعظم عمران خان 23سال سیاسی جہد کرے و کانود نا بالادستی کن جنگ کرے ۔ وزیراعظم عمران خان نا نظریہ و فلسفہ کانود و انصاف نا بالادستی ءِ ۔ تحریک انصاف اسٹ انگا جماعت ءِ ہرانا بنداو ہی انصاف آ تخنگانے ۔ اوپارے کہ ساڑی حکومت ہر بشخ اٹی گچینی کن اصلاحات اتنگ ءِ ۔ حکومت انگریز نا جوڑ کروک آ کانود اٹی بدلی کرینے ۔ اوپارے کہ بدلی نا سفر نا بناکانود اٹی بدلی اتسا بناکرینے ۔ حکومت السی راجی آسراتی نا کانود سازی آ پبی چکار کننگ ءِ ، اپوزیشن سینیٹ اٹی اسلام آباد ہائی کورٹ اٹی جج آتا کچ اٹی ودکی نا بلءِ مسترد کرینے ہراڑان ہزار آ مقدمہ غاک التواء نا گواچی ءُ سوالی تے مشکل آتا مون تروئی تمنگ ءِ ۔ السی آسودہی نا خاطر کانود سازی کن پارلیمنٹ اٹی اپوزیشن ہم بایدے کمک کے ۔ فردوس عاشق اعوان پارے کہ عدالتی ویل آتا ایسری کن خصوصی کمیٹی اس جوڑ کننگ انگ ءِ ہراٹی وکیل آتا نمائندہ، وزارت کانود، وزارت خزانہ و سی ڈی اے نا کمامدارآک اوار مریرہ ۔ اڑزان و دمدستی انصاف نا فراوانی ساڑی حکومت نا اہم اولیت ءِ ۔ او آزادی مارچ و دھرنانا بابت اسہ سوج اسے نا ورندی ٹی پارے کہ مولانا فضل الرحمان ہر بال آ چکا خلنگ خواہک ولے اونا آءوٹ مننگ نا گمان زیات ءِ انتئے کہ داوخت آ پچ و گراءونڈ سازگار افس ۔ مولانا بایدے پہہ مرے کہ گراءونڈ اٹی ساڑی مننگ ہی بھلو سرسہبی اس مریک ۔ اوپارے کہ دُن مف کہ مولانا چکا خلسا سیاسی گراءونڈ آن ہی پیشن مرے ۔ عالم دین نا کاریم خلقت نا ویل آتے ایسر کننگ و است آتیا مالم تخنگ مریک ۔ اواومیت ظاہر کرے کہ مولانا فضل الرحمان تینا طرز عمل آن کشمیر کاز ءِ نسخان تفک ۔
