وزیراعظم پاکستان عمران خان نا پروگرام نا رداٹ سرکاری خڑچ آتے کم کننگ و سرکاری ماڑی تے الس نا کاریم اٹ اتنگ کن گچین وسیلہ و جامع ڈٹ بندی نا کمک اٹ ساڑی روشنا گمان آتے پبی وڑ اٹ کاریم اٹ اتنگ مریک، گورنر بلوچستان امان اللہ خان یاسین زئی

کوءٹہ ۔ 04نومبر (اے پی پی) گورنر بلوچستان امان اللہ خان یاسین زئی پارینے کہ وزیراعظم پاکستان عمران خان نا پروگرام نا رداٹ سرکاری خڑچ آتے کم کننگ و سرکاری ماڑی تے الس نا کاریم اٹ اتنگ کن گچین وسیلہ و جامع ڈٹ بندی نا کمک اٹ ساڑی روشنا گمان آتے پبی وڑاٹ کاریم اٹ اتنگ مریک دارداٹ گورنر ہاءوس کوءٹہ تعلقدار محکمہ و چاہندار آتا کمک و راہشونی آن پائلٹ پروجیکٹ آ کاریم نا بناءِ کرے ۔ داہیتءِ او دوشنبے نادے آ گورنر بلوچستان ہاءوس کوءٹہ ٹی ڈائریکٹر جنرل ایگریکلچر جمعہ خان ترین نا کماشی ٹی ڈل اتون گپ و تران کرسا پارے ۔ اوڑدہی ٹی سرکار ی ماڑی تے الس نا کاریم اٹ اتنگ ، سرکاری خڑچ آتے کم کننگ حکومتی کٹیا ءِ ودفنگ و پوسکن آ گمان ودی کننگ نا بابت سرجم گپ و تران کننگا ۔ داوخت آ گورنر داہیت ءِ ستاکڑزوک گوندا کہ بلوچستان تینا یکہ جغرافیائی و چندی موسم تا سوب کشت وکشار و مالداری نا اہم جاگہ اس جوڑ مننگ کیک و بھاز آسانی اٹ سرکاری کہول آ کیہی بشخ آتے شون ترسا حکومتی کٹیا ٹی ودکی کننگ مریک و نن سائنس و ٹیکنالوجی نا پوسکن آ بھرم تیان فائدہ ہرفنگ کینہ ۔