اسلام آباد ۔ 04نومبر (اے پی پی) بنجائی وزیر توانائی عمر ایوب دوحہ ٹی پاکستان و قطر انا نیام اٹ معیشت ، واپار و تکنیکی کمکاری نا بابت پنچ می اسیجا وزارتی کمیشن نا دیوان اٹی پاکستان نا نمائندگی ءِ کیک ۔ وزارت توانائی آن جاری اعلامیہ نا رداٹ عمر ایوب خان قطر انا تینا ہم منصب سعد شریدہ الکعبی تون اوار اسیجا وڑاٹ دیوان نا کماشی ءِ کیک ۔ پنچ می وزارتی کمیشن نا اِرادے ئی دیوان اینو 5نومبر آ ایسر مریک ۔ عمر ایوب خان ، اقتصادی امور ڈویژن، پٹرولیم ڈویژن ، کامرس و واپار و دفترخارجہ نا نمائندہ غاتیا تالان تینا پاکستانی ڈل انا کماشی ءِ کیک ۔ اسیجا وزارتی کمیشن توانائی ، زرکاری، افرادی قوت، گوازی، واپار ، صنعت ، تعلیم ، سائنس و ٹیکنالوجی تون اوار چندی بشخ آتے ٹی ہڑتوم آ کنڈآتا کمکاری نا وارخواہی تیا سجفنگک و تدوک آ اسیجا وزارتی کمیشن نا دیوان نا فیصلہ غاتیا عملدرآمدنا جاچ ءِ ہلنگک ۔ دیوان اٹی بشخ ہلنگ آن بیدس بنجائی وزیر توانائی قطر انا بڑزکو شخصیت آتون ہم اوڑدہی کیک ۔
