اسلام آباد ۔ 04نومبر (اے پی پی) وزیراعظم عمران خان نا منظوری آن پد وزیر مواصلات مراد سعید نا پارت آ بابا گرونانک جی نا 550می ودی دے انا دود آتا چرجوئی ٹی پاکستان پوسٹ یات گاری ٹکٹ جاری کرینے ہراکہ کرتار پور راہداری ءِ ملنگ نا دے آ بہا کننگ کن ملرہ ۔ دوشنبے نادے آ پاکستان تحریک انصاف نا مرکزی میڈیا ڈیپارٹمنٹ آن جاری بیان نارداٹ سکھ یاتری تا آسراتی کن کرتارپور کمپلیکس اٹی پاکستان پوسٹ اسہ ڈاکخانہ اس ہم ملک ہراکان سکھ یاتریک دا یات گاری ڈاک ٹکٹ آتے ہلنگ کیرہ ۔ داکان بیدس دامسخت کن اسہ ڈاکخانہ اس ننکانہ صاحب اٹی ہم ملنگک ۔ دایات گاری ٹکٹ آک مچ آ ملک انا غٹ ڈاکخانہ غاتے ٹی ہم بہاکننگ کن دستیاب مریرہ ۔ پیشن نا ملک رہینگوک آ است خواہ بندغ آک دا یات گاری ٹکٹ آتے کراچی فلیٹلی بیورو و اسلام آباد جی پی او آن دوئی کننگ کیرہ ۔ داکان بیدس داٹکٹ آتے یونیورسل پوسٹل یونین نا 192باسک ملک آتے ٹی فراوان کننگک ۔ ہندن ءُ ملک ہراڑے سکھ مذہب نا پیروکار آک رہینگرہ ہموڑے پاکستانی سفارت خانہ نا کمک اٹ دا ٹکٹ آتا بہاکننگ کن گام گیج کننگک، وزیراعظم عمران خان نا کماشی ٹی پوسکن آ پاکستان نا تغ انا تعبیر کن حکومت متاماری کننگ ءِ ہرانا تصور ءِ مصور پاکستان علامہ محمد اقبال و بابائے قوم قائد اعظم محمد علی جناح ئسک تسوسر ۔ وزیراعظم عمران خان نا پوسکن آ پاکستان نا کوشست دراصل بانیان پاکستان نا ہمو تصور پاکستان نا قیام ئس ہراڑے مذہبی رواداری ، مذہبی آجوئی ، ہم گرنچی و غٹ شاری تے اسہ وڑ حق دوبرے ۔ ساڑی حکومت اولی دے آن وزیراعظم عمران خان نا کماشی ٹی اقلیت آتا مذہبی آجوئی و بریبربنداوی انسانی حق انا رکھ ءِ المی کننگ اٹ لگوک ءِ ۔ وزیراعظم عمران خان دا بابت سکھ برادری تون وعدہ کریسس کہ او بابا گرونانک صاحب نا 550می ودی دے انا وخت آ کرتارپور راہداری ءِ ملسا سکھ برادری ءِ عظیم ءُ ٹیکی اس ایتک ، وزیراعظم پاکستان اسہ سال انا چنکو وخت اسے ٹی تینا وعدہ ءِ پورو کرسا نشان تس، دا بابت 9 نومبر آ اسہ عظیم الشان دود اسے ٹی کرتار پور راہداری نا بناءِ کننگک ۔ دود اٹی بھارت تون اوار مچ آ دنیا غان سکھ یاتریک دا تاریخی دود اٹی بشخ ہلیرہ ۔ کرتارپور راہداری آن سکھ مذہب نا پیروکار آتے با آسانی تینا مقدس ہند آتا زیارت و مذہبی رسم آتا ادائیگی ممکن مننگ کیک و داڑتون اوار اوار ہڑتوم آ ہمسایہ ملک آتا نیام اٹ ہم گرنچی و خیر سگالی ءِ مون آ دننگک ۔
