وزیراعظم نا خصوصی کمکار ڈاکٹر فردوس عاشق اعوان و بنجائی وزیر پیر نورالحق قادری نا پریس کانفرنس

اسلام آباد ۔ 03نومبر (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ مولانا فضل الرحمان نا کنڈآن الٹی میٹم ءِ پدی ہلنگ آ خوشی ءِ و ڈی چوک آ ہِننگ و وزیراعظم نا ایگزیکٹو حیثیت ءِ چیلنج کننگ آن پدی مننگ نانن خیرمقدم ءِ کینہ، تدوک آ منہ دے آن اسلام آباد اٹی تھیٹر چلینگ انگ ءِ، مولانا فضل الرحمان نا دھرنہ غان غٹ آن زیات نسخان کشمیر کاز ءِ مس، اسلام آباد نا شاری تا ہردے ئی زند زہمی مس، چناک اسکول آتیا ہِننگ کتوس، نن جمہوری خلقت اُن، انتشار و للکار نا جاگہ غا جمہوری وڑاٹ ویل آتے پیش کنگ و افہام و تفہیم نا کمک اٹ ویل آتا ایسری آ باور کینہ، ہنداسوب ءِ کہ حکومت جمہوری روایت آتا رداٹ مارچ کننگ و اولیکو وار عزم معلوم مننگ آن پد ہم مارچ اٹی بشخ ہلوک آتے جمہوری حق انا کاریم اٹ اتنگ نا پبی موکل و بشخ ہلوک آتے ہر وڑنا آسراتی تسن، وزیراعظم آ جندی جلہو کننگا ولے وزیراعظم مذاکرات کن کمیٹی اس جوڑ کرے ۔ داخیال آتا درشانی ءِ اویک شنبے نادے آ پی آئی ڈی ٹی بنجائی وزیر مذہبی امور پیر نورالحق قادری تون پریس کانفرنس کرسا کرے ۔