وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان نا ضلعی عدالت آتا دورہ غان پد میڈیا تون گپ و تران

اسلام آباد ۔ 01نومبر (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ چیف جسٹس اسلام آباد ہائی کورٹ نا پارت آتیا ضلعی کچہری اسلام آباد اٹی بنداوی آسراتی تا جاچ ءِ ہلکونن، عدالت آتے ٹی بنداوی آسراتی تا کمتی ءِ ، دا مشکل حالیت آتے ٹی جج آتا فرض انا ادائیگی ووکیل آتا حوصلہ ستاکڑزک، دنیا ٹی وڈی خوری نا برخلاف دھرنا و مارچ مریک، نناداڑے سیاسی فنکار وڈی خوری نا رکھ اکن مارچ کننگ ءِ، حکومت جمہوریت دوست نا کڑد ءِ ادا کرے، داسہ اپوزیشن نا وڈی خور زدہ دروشم تا ایجنڈاءِ ہروئی ءِ، مار چ انا جمہوری حق ءِ السی مشکل آتے ٹی ودکی کن کاریم اٹ اتنگ آن پاناد کننگے، حکومت معاہدہ نا رداٹ مارچ انا کسر اٹی ہچ ءُ اڑاند اس شاغتنے، اوفتے اوفتا پسند کروک آ جاگہ اس تس وخت اس کہ دیر ، بجلی تون اوار غٹ آسراتی تے ہم فراوان کرے ۔ او جمعہ نادے ضلعی عدالت آتا دورہ غان پد میڈیا تون گپ و تران کریکہ ۔ اوپارے کہ چیف جسٹس نا منت وار اُٹ ہراکنے بننگ نا موقع اس تس ، کنا زند انا اولیکو موقع ءِ کہ معاملہ سے آ عدالت آ بریو، کنے آ اینو اسکان ہچ ءُ ایف آئی آر اس اف، ای ہموسیاست دان تیان افٹ ہراتھانہ کچہری نا سیاست ءِ کیرہ ۔ چیف جسٹس اسلام آباد ہائی کورٹ نا پارت آ وکیل آتا ٹیم اتون اوار ضلعی کچہری نا دورہ ءِ کریٹ، داڑے ہرا مشکلات و سائل آتا چیلنج آک ءُ، اوفتے تینا خن تیٹی خنانٹ، است ہسونی اٹ پاننگک کہ بنجائی دارالحکومت نا ضلعی عدالت آتے ٹی حالیت آک گچین افس، شرفدار آ جج آتے کن آسراتی اف، سائل آتا تولنگ کن جاگہ اف، دُن ءُ چاگڑد اس اف کہ فرض آسانی اٹ ادا کننگے ۔ اوپارے کہ 30 سال و پدریسہ 10 سال حکومت کروک آک ہم ویل آتے ایسر کتوس، مشکل انگا حالیت آتے ٹی خذمت سرانجام تروک آ شرفدار جج صاحب و پیش مروک آ وکیل آتا حوصلہ نا ستاءِ کینہ ۔ اوپارے کہ دحالیت آتے درست کننگ کن کڑد ادا کیوہ ۔ وکیل برادری ءِ باوری کرفنہ کہ وزیراعظم عمران خان نا اولیکو اولیت انصاف ءِ ، انصاف نا دا جہد ءِ مون آ دننگ و اختہ مروک آ الس کن جہد کننگ وزیراعظم نا عزم ءِ ۔ اوپارے کہ 60 سال مست سی ڈی اے نا پلان ءِ جوڑ کننگا، ہرادے ہچ کس بدل کتو، داسہ وزیراعظم عمران خان نا سرکڑدہ پلان اس جوڑ کرینے ہراٹی ضلعی عدالت آتا حالیت ءِ گچین کننگ ہم اوار ءِ ۔ ڈاکٹر فردوس عاشق اعوان پارے کہ جج آتا کچ انا کمتی ءِ پورو کننگ پارلیمنٹ نا اسیجا زمواری ءِ، غٹ سلاہ و سوج و حالیت آتے وزیراعظم نا مون آ تخنہ، دا معاملہ ٹی ہم وزیراعظم عمران خان اومیت نا روشنائی ثابت مریک ۔ اوپارے کہ دِکہ کنسا سائل آک عدالت آتیا بریرہ ، ہراتم عدالت آتے ٹی بنداوی آسراتی مف تو سائل آک مایوس مریرہ ۔ انسانیت نا خذمت ہی سیاست نا اصل محور و مرکز ءِ، عمران خان نا راجی خذمت آک غٹ انا مون آٹی ءُ ۔ اسہ سوج اسے نا ورندی ٹی اوپارے کہ مولانا فضل الرحمان نا مارچ وڈی خوری ءِ رکھ تننگ کن اسہ جہد اسے، کرپشن زدہ غٹ دروشم آک کنٹینر آتیا یکجاءُ، نن اوفتے فائیو اسٹار آسراتی تسونن، جمہوریت نا پرچار کروک آک اینو جمہوری حکومت ءِ بِٹنگ کن بسنو ۔