کشمیری تا سفیر و ترجمان اُٹ، مچ آ دنیا ٹی وکیل مرسا اوفتا وکالت ءِ کیوہ، وزیراعظم عمران خان نا گلگت اٹی یوم آزادی پریڈ آن تران

گلگت ۔ 01نومبر (اے پی پی) وزیراعظم عمران خان گلگت بلتستان نا الس ءِ یوم آزادی آ مبارکبادی ترسا پارینے کہ گلگت بلتستان نا خلقت قربانی ترسا تینا علاقہ ڈوگرہ راج آن آجو کرفیر، دا علاقہ چین پاکستان اقتصادی راہداری نا گیٹ وے ءِ ، دنیا ٹی گلگت بلتستان آن زیات زیبا ہچ ءُ علاقہ اس اف، نن سیل و سوات ءِ مون آ دننگ کن دنیا نا 70 ملک آتا سیل و سواتی تیکن ویزہ ءِ آسان جوڑ کرینن، سیل و سوات ءِ مون آ دننگ آن علاقہ ٹی شونہالی بریک ، بھارتی وزیراعظم نریندر مودی مقبوضہ کشمیر اٹی تینا آخیریکو پتہ ءِ گوازی کرینے، دنیا نا ہچ ءُ واک اس کشمیری تا آجوئی نا کسر ءِ توننگ کپک ، ہندن ءُ کرفیو ءِ چٹفنگک انسان تا سمندر اس پیش تمسا آجوئی خواہک، پاکستانی قوم کشمیری تتون سلوک ءِ ۔ کشمیری تا سفیر و ترجمان اُٹ، مچ آ دنیا ٹی وکیل مرسا اوفتا وکالت ءِ کیوہ ۔ وزیراعظم گلگت اٹی یوم آزادی پریڈ آن تران کریکہ ۔ داوخت آ وزیراعظم پارے کہ 1947ء ٹی گلگت بلتستان نا خلقت آجوئی کن جنگ کرے و 1948ء ٹی ڈوگرہ راج آن تینا علاقہ ءِ آجو کرفیر ۔ 1947ء نا ہیروتے خراج عقیدت پیش کینہ ۔ اوپارے کہ کلمہ نا طاقت ننے انسان تا مون آ شیف مننگ کن الیپک، پاکستان اسٹ انگا ملک ءِ ہرا اسلام نا پن آ جوڑ مس، مدینہ نا ریاست ننکن اسہ مثال اسے و داریاست ہم دنیا نا بھلاواک آتے شیف کننگ آ بیوس کریسس، پاکستان اللہ تعالیٰ نا اسہ خاص ءُ ٹیکی اسے ، راج اٹی برکت بریک و ہندا نظام مدینہ نا ریاست نا بنداوی اصول ئس ۔ اوپارے کہ گلگت بلتستان چین پاکستان اقتصادی راہداری نا گیٹ وے ءِ ، چین دنیا ٹی ترندی اٹ شون ہلوک آ ملک ءِ ، و دا علاقہ ننے چین اتون ملفک ۔ وزیراعظم پارے کہ کنے گمر ءِ کہ گلگت بلتستان نا یوم آزادی آ داڑے ساڑی اُٹ، داجاگہ نا خلقت تینا آجوئی کن بھاز قربانی تس ۔ مقبوضہ کشمیر اٹی الس اینو ظلم انا گواچی ءُ، نریندر مودی 5اگست آ انتس کہ کرینے او تینا آخیریکو پتہ ءِ گوازی کرینے داسہ ہندن کہ کرفیو ءِ ہرفنگک انسان تا سمندر پیش تمسا آجوئی خواہک ، ہچ ءُ واک اس داسہ کشمیر ءِ آجو مننگ آن توننگ کپک ۔ وزیراعظم پارے کہ 52سال مست اولیکو وار گلگت بلتستان آ بسوسٹ ہموتم دا علاقہ ٹی داخہ شونداری الوکہ، او مچ آ دنیا ءِ خنانے ولے ہرا زیبائی گلگت بلتستان اٹی ءِ او پین جاگہ اس اف ۔ وزیراعظم پارے کہ پاکستان ءِ سیل و سوات کن ملانن، 70 ملک آتیان بروک آ سیل و سواتی تے ویزہ داسہ ایئر پورٹ آ ملک، چندی علاقہ غاتے ٹی این او سی نا شڑت ءِ ہم چٹفنگانے داڑان سیل و سوات ءِ مون آ دننگک و داڑان علاقہ ٹی شونداری بریک ۔ وزیراعظم پارے کہ مقبوضہ کشمیر اٹی مسہ تُو آن کرفیو خلوک ءِ ، 9 لکھ بھارتی فوجی کشمیری ءِ یرغمال کرینو، اوفتا بنداوی حق ءِ خلنگانے ۔ وزیراعظم پارے کہ او کشمیری تا سفیر و ترجمان ءِ و مچ آ دنیا ٹی اوفتا سفیر و وکیل مرسا اوفتا وکالت ءِ کیک ۔ وزیراعظم پارے کہ گلگت بلتستان نا الس اگہ اجوئی کن جنگ کتوکہ تو مننگ کریکہ کہ او ہم مقبوضہ کشمیر نا الس آنبار مشکل آتون مون تروک مسرہ ۔ نادرن لائیٹ انفنٹری نا ورناک کارگل و ایلو محاذآتیا ناقابل فراموش قربانی تسر، پاک فوج دہشت گردی نا برخلاف جنگ ءِ کٹسا ملک ءِ رکھ کرینے ۔ وزیراعظم پارے کہ پاکستان ءِ تینا نت تیا سلفوئی ءِ و ہندا قوم دنیا ٹی اسہ مثال اس مریک ۔ داکان مست وزیراعظم یات گار شہید آتیا حاضری تس و پھل شاغا ۔ داوخت آ پاک فوج انا چاک و چوبند دستہ وزیراعظم پاکستان ءِ سلامی تس ۔ گورنر گلگت بلتستان و وزیراعلیٰ گلگت ہم داوخت آ ساڑی ئسر ۔