اسلام آباد ۔ 31اکتوبر (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ حکومت جمہوری روایت آتا مدنظر سیاسی برانز نا موکل تس، سیاست نا پڑ اٹی مقابلہ کننگ اٹی ننے ہچ ءُ دقت اس اف ، برانز کروک آتے خیال کروئی مریک کہ اوفتا حرکت اسے آن پاکستان نا تشخص آ آنچ بف ۔ پنچ شنبے نادے آ داڑے وزیر داخلہ اعجاز احمد شاہ تون اوار پریس بریفنگ اٹی گپ و تران کرسا ڈاکٹر فردوس عاشق اعوان پارے کہ اسلام آباد اٹی چندی سفارت خانہ غاتا 7 ہزار بندغ آتا سیکورٹی حکومت نا زمواری ءِ ، مستین اٹی میرٹ آ جلہو آن پد اقوام متحدہ پاکستان ءِ نان فیملی اسٹیشن اس گونداسس ولے اوکان پد اقوام متحدہ اسلام آباد کن فیملی اسٹیشن نا درجہ ءِ بحال کرے ۔ اوپارے کہ حکومت نا کوشست آتیان ملک اٹی امن و ایمنی بحال مسنے، نن سیاسی پڑانا گوازی گر اُن، سیاست نا پڑاٹی مقابلہ کننگ اٹ ننے ہچ ءُ دقت اس اف ۔ اوپارے کہ حکومت جمہوری روایت آتا مدنظر سیاسی برانز نا موکل تس ۔ برانز کروک آتے خیال کروئی مریک کہ اوفتا حرکت اسے آن پاکستان نا تشخص آ آنچ بف ۔ اوپارے کہ مولانا فضل الرحمان نا سیاسی بیانیہ ٹی ہچ ءُ جان اس اف، پرامن مارچ انا حق ءِ حکومت امنا کرینے ولے اومیت کینہ کہ برانز کروک آک ہرا وعدہ غاتے کرینو اوفتا پاسداری ءِ کننگک ۔
