اسلام آباد ۔ 31اکتوبر (اے پی پی) بنجائی وزیر ریلوے شیخ رشید احمد پارینے کہ رحیم یار خان نا خڑک تیز گام ایکسپریس ٹرین شکست اٹی زیات زوال مسافر آتا چلینگوک آٹرین آن جپ خلنگ نا سوب آن مسنے ۔ پنچ شنبے نادے آ نجی ٹیلی ویژن آ ٹرین شکست آ ہیت کرسا بنجائی وزیر ریلوے شیخ رشید احمد پارے کہ خاخر لگنگ آن ٹرین نا مسہ بوگی زہمی مسنو، ہرافتیا تبلیغی جماعت نا بندغ آک سوارئسر ، اوپارے کہ مسافر آتون ساڑی اِرا سلنڈر نا ترخنگ نا سوب آن بوگی تیٹی خاخر لگا و زیات زوال مسافر آتا چلینگوک آ ٹرین آن جپ خلنگ نا سوب آن مسنے ۔ اوپارے کہ کھاریاں و ملتان اٹی برن یونٹس ارے، بھاز ٹھپی مروک آتے رحیم یار خان آ گدریفنگانے ۔ وزیر ریلوے نا پاننگ ئس کہ دا واقعہ ٹی مسافر آتا غلطی ءِ ہرافک ناشتہ کننگ کن سلنڈر ءِ لگفیر ہرا ترخاو چلینگوک آ ٹرین اٹی خاخر لگا ۔ شیخ رشید پارے کہ مسافر ٹرین اٹی سلنڈر ءِ ہراوڑ ایسور دانا جاست وپاست ءِ کننگک ۔ مسافر چولہا تے تینا تھیلی تیٹی تخرہ و کانود آن خلپسہ، اوپارے کہ اگہ مسافر کراچی آن سلینڈر تین تون ہرفیسر و ٹرین آ لگاسر تو نوٹس ہلینہ، چنکا ریلوے اسٹیشن تیا اسکینر نا نظام ساڑی اف ہنداخاطران جاست وپاست کینہ کہ مسافر سلینڈر اتون ہرا اسٹیشن آن تیز گام ٹرین آ سوار مسوسر ۔
