ساڑی صوبائی حکومت وزیراعلیٰ بلوچستان جام کمال خان نا کماشی ٹی تعلیمی ادارہ غاتا مالی ویل آتا ایسری کن کوشست کننگ ءِ ، ترجمان حکومت بلوچستان لیاقت شاہوانی

کوءٹہ ۔ 30 اکتوبر (اے پی پی) ترجمان حکومت بلوچستان لیاقت شاہوانی پارینے کہ ساڑی صوبائی حکومت وزیراعلیٰ بلوچستان جام کمال خان نا کماشی ٹی تعلیمی ادارہ غاتا مالی ویل آتا ایسری کن کوشست کننگ ءِ و دا ویل آتے اولیتی بنداو تیا ایسر کننگ انگ ءِ دا بابت یونیورسٹی تا مالی گرانٹ ءِ 550 ملین روپئی آن ودفسا 1500 ملین روپئی کننگانے ۔ ترجمان صوبائی حکومت لیاقت شاہوانی نا پاننگ ءِ کہ صوبہ ٹی پوسکن آ کالج آتا جوڑ جاڑ و شونداری آن نئے بیرہ آب اٹ تعلیم نا وارخواہی دوبریک بلکن ورناتے روزگار نا وارخواہی ہم ملک ۔ ترجمان پارے کہ پولی ٹیکنیک کالج آتے ٹی ہم پوسکن آاستاد آتا بھرتی نا عمل پبلک سروس کمیشن نا کمک اٹ بناکننگانے تانکہ زوت آن زوت استاد آتا کمتی ءِ پورو کننگ مرے و طالب علم آتے آب اٹ تعلیم نا وارخواہی ملنگ کے ۔ ترجمان پارے کہ ساڑی صوبائی حکومت وزیراعلیٰ بلوچستان جام کمال خان نا کماشی ٹی ہرافیصلہ غاتے کننگ ءِ اوفتا مثبت بھرم مرتب مریک و بروک آ دے تیٹی بھاز بھلو بدلی اس نظر بریک ۔