مسلم لیگ (ن) نا راہشونک نواز شریف نا جان جوڑی آ سیاست کپس، پاکستان تحریک انصاف نا راہشون سینیٹر فیصل جاوید نا نجی نیوزچینل تون گپ و تران

اسلام آباد ۔ 30 اکتوبر (اے پی پی) پاکستان تحریک انصاف نا راہشون سینیٹر فیصل جاوید پارینے کہ پاکستان مسلم لیگ (ن) نا راہشونک مسکوہی وزیراعظم نواز شریف نا جان جوڑی آ سیاست کپس و دا بابت سیاسی پوائنٹ سکورنگ کپس ۔ نجی نیوز چینل تون گپ و تران کرسا اوپارے کہ مسلم لیگ (ن) سیاسی پوائنٹ سکورنگ کن نان ایشوآ سیاست کننگ ءِ، مسلم لیگ (ن) نواز شریف نا جان جوڑی آ دروغ انا بیان تیان قوم ءِ بے وقوف جوڑ کننگ نا کوشست ءِ بایدے بند کے ۔ اوپارے کہ وزیراعظم عمران خان نا کماشی ٹی پاکستان تحریک انصاف نا حکومت عدلیہ نا سوگوی و کانود نا بالادستی کن سرگرم ءِ ، عدالت نواز شریف نا بابت انت کہ فیصلہ اس کیک حکومت اوڑاعمل کیک و مستین اٹی ہم عدالتی فیصلہ غاتیا عملدرآمد کنگسا کرینے و پین وخت اس ہم کیک ۔ سینیٹر فیصل جاوید محمد نواز شریف نا زوت جان جوڑی کن نیت است خواہی تا درشانیءِ ہم کرے ۔ نواز شریف نا درمان نا بابت جوڑ میڈیکل بورڈ و عدالت فیصلہ کیک ۔ اوپارے کہ تحریک انصاف اپوزیشن راہشون تا برخلاف جندی انتقام ہلپننگ ءِ بلکن قومی دولت نا لٹ وپل نا اوفتیان حساب ہلنگک ۔ اوپارے کہ مسلم لیگ (ن) نا راہشون احسن اقبال سیاسی پوائنٹ سکورنگ کن نواز شریف نا جان جوڑی نا بابت بیان تننگ ءِ ہلے انتئے کہ نواز شریف تینٹ تینا درمان آ است جم ءِ ۔ اوپارے کہ مسلم لیگ (ن) نا سرکڑدہ غاتے بایدے مرے کہ او نواز نا جان جوڑی نا بابت وڑوڑنا بیان آتے تننگ ءِ ہلر و اوفتے السی ہمدردی دوئی کننگ نا جاگہ غا نواز نا جان جوڑی آ چکار تخر ۔ سینیٹر فیصل جاوید پارے کہ نواز شریف نا مار میڈیا غا تینا باوہ نا ناجوڑی ءِ ودآن ود پیش کننگ خواہک ۔ اوپارے کہ ہراتم وزیر جان جوڑی پنجاب یاسمین راشد ہسپتال نا دورہ ءِ کرے تو نواز شریف ہم درمان آ است جمی نا درشانی ءِ کرے ۔ اوپارے کہ مچ آ قوم وزیراعظم و سلہہ بند فوج اتون یکجا سلوک ءِ وخت اس کہ ملک شونداری نا کسر آ اسہ پوسکن ءُ سفر اسے نا بناءِ کرینے و غٹ بشخ آتے ٹی سرسہبی دوئی کننگ والا ءِ ۔