کیوبا نا نائب صدر رابرٹو مورالزاوجیدا نا وزیر خارجہ شاہ محمود قریشی تون اوڑدہی

ہڑتوم آ ملک آتا دواسازی، طب و بائیو ٹیکنالوجی نا بشخ آتے ٹی ہڑتوم آ کنڈآتا کمکاری ءِ مون آ دننگ آ امنا

اسلام آباد ۔ 30اکتوبر (اے پی پی) پاکستان و کیوبا دواسازی، طب و بائیو ٹیکنالوجی نا بشخ آتے ٹی ہڑتوم آ کنڈآتا کمکاری ءِ مون آ دننگ آ امنا کرینو، ہڑتوم آ ملک آتا نیام اٹ سرکاری و سفارتی پاسپورٹ آ ویزہ نا شڑت انا چٹفنگ نا معاہدہ طے مس ۔ دا امنائی کیوبا نا نائب صدر رابرٹو مورالزاوجیدا و وزیر خارجہ شاہ محمود قریشی نا نیام اٹ ہیت وگپ اٹی مس ہرافک چارشنبے نادے آ داڑے وزارت خارجہ ٹی ڈل اتون اوار اوڑتون اوڑدہی کریر ۔ ترجمان دفترخارجہ نا رداٹ وزارت خارجہ غا سرمننگ آ وزیر خارجہ مخدوم شاہ محمود قریشی ڈل ءِ بخیر کرے ۔ اوڑدہی ٹی ہڑتوم آ کنڈآتا تعلقداری ، مقبوضہ جموں و کشمیر نا حالیت آتون اوار تین پہ تینی است خواہی نا اہم معاملہ غاتیا گپ و تران کننگا ۔ وزیر خارجہ شاہ محمود قریشی پارے کہ پاکستان کیوبا تون تینا ہڑتوم آ کنڈآتا تعلقداری تے بے کچ قدر انا نظر اٹ ہرک ۔ زمی جمب مرے یا ایلو قدرتی آفت آک، کیوبا مشکل ساہت اٹی مدام پاکستان تون تفینے ۔ داوخت آ کڑدہ غاک دواسازی، طب و بائیو ٹیکنالوجی نا بشخ آتے ٹی ہڑتوم آ کنڈآتا کمکاری ءِ مون آ دننگ آ امنا کریر ۔ وزیر خارجہ کیوبن نائب صدر ءِ مقبوضہ جموں و کشمیر نا تازہ انگا حالیت آتیان معلومدار کرے و پارے کہ 5 اگست آ بھارت نا مقبوضہ جموں و کشمیر اٹی کروک آ اسہ کنڈی، غیر آئینی گام گیج ڈیہہ نا امن و ایمنی ءِ خطرہ ٹی بٹینے ۔ بھارت نا کنڈآن مقبوضہ جموں و کشمیر اٹی انسانی حق انا سنگین خلاف ورزی تا چرجوئی برجاءِ ۔ شاہ محمود قریشی پارے کہ کیوبا تون اوار جہانی برادری ءِ بھارت آ زور شاغوئی مریک کہ او کودک کشمیری تیانافذ بے سوب کرفیو ءِ دمدستی وڑاٹ چٹفے و اقوام متحدہ نا قرارداد آتیا عملدرآمد ءِ المی کے ۔ اوپارے کہ بھارت نا کنڈآن مقبوضہ جموں و کشمیر اٹی تدوک آ 87 دے آن بدترین کرفیو برجاءِ ۔