کرتار پور راہداری ءِ ملنگ و بابا گرونانک یونیورسٹی ءِ جوڑ کننگ سکھ آتا تاریخ اٹی جوان انگا لوز آتے ٹی نوشتہ کننگک، پنجابی سکھ سنگت نا چیئرمین سردار گوپال سنگھ نا ’’اے پی پی‘‘ تون گپ و تران

اسلام آباد ۔ 29 اکتوبر (اے پی پی) پنجابی سکھ سنگت نا چیئرمین سردار گوپال سنگھ پارینے کہ کرتار پور راہداری ءِ ملنگ و بابا گرونانک یونیورسٹی ءِ جوڑ کننگ سکھ آتا تاریخ اٹی جوان انگا لوز آتے ٹی نوشتہ کننگک، وزیراعظم عمران خان و آرمی چیف قمر جاوید باجوہ سکھ قوم انا محسن آک ءُ ، کرتار پور راہداری ءِ ملنگ مچ آ دنیا نا سکھ قوم انا تغ تا تعبیر و پاکستان مخالف قوت آتا بوز آ چپانٹ اسے ۔ ’’اے پی پی‘‘ تون گپ و تران کرسا سردار گوپال سنگھ پارے کہ دنیا نا ملک آتیان زیات پاکستان اٹی رہینگوک آ سکھ آک خوش و است جم ءُ ۔ بابا گرونانک ننا مذہب نا بانی و دنیاٹی چاہوک ءُ شخصیت اسے اونا پن آ یونیورسٹی اس جوڑ کننگ نا گام گیج حکومت پاکستان نا دا سوچ انا عکاسی ءِ کیک کہ پاکستان بابا گرونانک نا اخس عزت ءِ کیک و سکھ قوم انا خڑک اونا اخس زیات اہمیت و شرف ءِ ۔ اوپارے کہ کرتار پور اٹی دنیا نا غٹ آن بھلا گوردوارہ جوڑ مننگ والا ءِ ہراڑا حکومت پاکستان ارب آ روپئی خڑچ کننگ ءِ ، ہنداوڑ بابا گرونانک نا پن آ دنیا ٹی اولیکو یونیورسٹی ہم پاکستان اٹی جوڑ مننگ ءِ ۔ 2019ء نا سال سکھ قوم انا خوشی و تغ تا تعبیر نا سالءِ داڑکن عمران خان و جنرل قمر جاوید باجوہ نا منت وار اُن، او سکھ آتا محسن آک ءُ ۔ سردار گوپال سنگھ پارے کہ مچ آ دنیا نا سکھ تدوک آ 70 سال آن ہر دے دے اٹی اِرا وار دعاکریرہ کہ ننے بابا جی گرونانک نا غٹ گوردوارہ غاتسکان آسانی رسینگے و داسہ ننا ہر دعا عمران خان نا دور اٹی قبول مسنے ۔ اوپارے کہ جہانی کہول آ پاکستان دشمن قوت آک ہرا دا تاثر تننگ نا کوشست کیرہ کہ پاکستان اٹی اقلیت آتون ناروا سلوک کننگک ، بابا گرونانک نا پن آ یونیورسٹی نا جوڑ کننگ پاکستان دشمن قوت آتا بوز آ چپانٹ اسے ۔