وزیراعظم نا پنجاب اٹی امن و ایمنی نا حالیت آتا بابت بڑزکو کہول انا دیوان اٹی گپ و تران

وزیراعظم عمران خان نا ڈوہدار بندغ آتا برخلاف پبی ایکشن ہلنگ نا پارت

وزیراعلیٰ پنجاب، بنجائی و صوبائی وزیر آک و سینئر کمامدارآتا دیوان اٹی شرکت

لاہور ۔ 28 اکتوبر (اے پی پی) وزیراعظم عمران خان ڈوہدار بندغ آتا برخلاف پبی ایکشن ہلنگ نا پارت کرسا پارینے ک اگہ آفیسر آتیا داچرجوئی ٹی زور شاغنگا تو او اوفتے تون سلک ۔ اوداپارت ءِ دوشنبے نادے آ پنجاب اٹی امن و ایمنی نا حالیت آتا بابت بڑزکو کہول انا دیوان ناکماشی ءِ کرسا تس ۔ دیوان اٹی وزیر داخلہ بریگیڈیئر (ر) اعجاز احمد شاہ، بنجائی وزیر تعلیم و کسبی تربیت شفقت محمود، وزیراعظم نا خصوصی کمکار ڈاکٹر فردوس عاشق اعوان ، وزیراعلیٰ پنجاب سردار عثمان بزدار ، صوبائی وزیر کانود محمد بشارت راجہ ، صوبائی وزیرراجی آسراتی محمد ہاشم ڈوگر، صوبائی وزیر گوازی محمد تیمور خان، صوبائی وزیر خواری انصر مجید خان، چیف سیکرٹری پنجاب یوسف نسیم کھوکھر و ایلو بڑزکو آفیسر آک ساڑی ئسر ۔ دیوان اٹی آئی جی پنجاب نا مچ آصوبہ ٹی ڈوہ انا توننگ ، بھلا ڈوہ تیٹی اوار عنصر آتا برخلاف کارروائی ، تھانہ کلچر اٹی بدلی، پولیس کارندہ غاتا کسبی تربیت، گچین شہرت نا حامل کارندہ غاتا است بڈی، کانود اٹی ترمیم و ڈوہدار عنصر آتا برخلاف الس اٹی آگاہی مہم نا بابت سلاہ و گام گیج آتیا بشخ ہلوک آتے حوال تس ۔ وزیراعظم عمران خان ءِ قصور و چونیاں ٹی چناتتون بیدادی نا واقعہ و چائلڈ پور نوگرافی ٹی اوار عنصر آتا برخلاف 6تُو انا تہہ ٹی اسہ مربوط ءُ حکمت عملی اسے نا رداٹ پیدوار ایکشن پلان آ عملدرآمد نا بابت معلومدار کننگا ۔ وزیراعظم عمران خان قصور و چونیاں ٹی چناتے تون بیدادی نا واقعہ غاتا بابت پارے کہ داواقعہ غاتیا اودے بھاز صدمہ مسنے ، داڈوہ انا سوب آن اللہ نا عذاب بریک ۔ وزیراعظم وزیراعلیٰ پنجاب و تعلقدار کمامدار آتے پارت کرے کہ او قصور، چونیاں و ایلو زہمی علاقہ غاتا دورہ ءِ کرسا ہموجاگہ نا عالم دین، صاحب حیثیت بندغ، اسکول آتا استاد و لمہ و باوہ غاتون اوڑدہی کرسا اوفتے ٹی چناتا دا ڈوہ انا گواچی مننگ آن بچفنگ نا مناسب تربیت و اوٹی اوار عنصر آتا پیدواری نا آگاہی تالان کے ۔ وزیراعظم پارے کہ دارداٹ اسہ پبی ءُ السی آگاہی مہم اس بناہم کننگے انتئے کہ دا جرم انا مقابلہ حکومت و الس اواری اٹ کننگ کیرہ ۔ وزیراعظم بھلا ڈوہدار عنصر آتا برخلاف پبی ایکشن ہلنگ نا پارت کرے وپارے کہ دا بابت اگہ آفیسر آتیا زور شاغنگا تو او اوفتے تون سلک ۔