سکھر۔ 06مئی (اے پی پی ) وزیراعظم محمد نواز شریف پارینے کہ ننا ایجنڈہ پاکستان نا شون و شونہالی ئِ وخت اس کہ ایلو کنڈا دہشت گرد و روڈ و کسر تا برانزی سیاست ناکمک اٹ پاکستان نا شون نا کسر ئِ توروک آتا ایجنڈ ہ اسٹ ئِ۔ پاکستان روشنی تا پلو آ ہِننگ ئِ ہرااودے تہاری تا کنڈا دِکہ تننگ خوارہ قوم اوفتا ایجنڈہ ئِ مسترد کیک ، قوم خواہک کہ پاکستان آن تہاری، بے روزگاری ، جہالت و نیزگاری چٹے،نن پاکستان ئِ ہمو کنڈ ا دننگ خوانہ۔ او داخیال آتا درشانی ئِ جمعہ آ داڑے کراچی لاہور موٹروے نا ملتان سکھر سیکشن نا بنداو ئِ تخنگ آن گڈ اسہ بھلو السی مچی سیان تران کرسا کرے ہرا 294ارب روپئی نا خڑچ آن پاک چین اقتصادی راہداری ڈٹ انا رداٹ جوڑ جاڑ کننگ انگ ئِ۔ وزیراعلیٰ سندھ سید قائم علی شاہ ، وزیر مملکت عبدالحکیم بلوچ، مسلم لیگ (ن) سندھ انا صدر محمد اسماعیل راہو، سینیٹر نہال ہاشمی و ایلو بڑزکو کمامدار آک ہم ساڑی ئسر۔ وزیراعظم پاک چین اقتصادی راہداری ، موٹرویز تن اوار بھلا بھلاشونداری ڈٹ آتا ذکر ئِ کرسا پارے کہ دا ڈٹ آتا ملک انا جوڑ جاڑ و شون آ بے کچ مثبت زئم تمک۔ تنقید کروک آتے دا ڈٹ آتا اندازہ اف، ننا مخالفین آک خوارہ کہ دا ڈٹ آتے انت اکن جوڑ کننگ انگ ئِ، نواز شریف دا ڈٹ آتے انت اکن جوڑ کننگ ئِ، اودے توبو، وڑانا وڑاسیٹ شون نا عمل ئِ لتاڑبو، ننا توجوہ ئِ شون آن اسہ پلو کرسا پین اسہ کنڈ اسیا دبو۔ وزیراعظم پارے کہ دا مخالفین آتا ایجنڈہ ئِ ، ننا ایجنڈہ شون و شونہالی ئِ ، ننے ہرا مینڈیٹ ملانے اودے پورو کینہ۔ اوپارے کہ کراچی نا ڈٹ مہالو شروع مسکہ اگہ دھرنہ غاتا سیاست شروع مفروسس، اونا سوب آن داڈٹ ہرے آن بناءکننگ انگئِ۔ اوپارے کہ دہشت گرد آک پاکستان نا الس نا شون نا کسر ئِ توننگ خوارہ، الس نا شونہالی نا کسرئِ توننگ خوارہ ، امن و ایمنی نا کسرئِ توننگ خوارہ ، داسا الس پائے کہ روڈ و کسرآتے توروک آک انت کننگ ئُ ، اوفتا ایجنڈہ انت ئِ ، اوہم امن و ایمنی و شون نا کسر ئِ توننگ و ملک اٹی افراتفری خوارہ ۔ الس پائے کہ د اہڑتوم آتے ٹی انت پرخ اس سلیسنے۔ ہڑتوم آک پاکستان نا شون نا کسرئِ توننگ خوارہ۔ وزیراعظم محمد نواز شریف پارے کہ اینو نا پاکستان مسہ سال مست انا پاکستان آن ، اینو نا بلوچستان مسہ سال مست انا بلوچستان، اینو نا کراچی مسہ سال مست انا کراچی آن گچین ئِ۔ ملک اٹی بجلی نا لوڈشیڈنگ نا حالیت، ملکی معیشت ، امن و ایمنی نا حالیت اللہ نا فضل و کرم اٹ مسہ سال مست آن بھاز گچین ئُ۔ اوالس تون ہیت کرے کہ مسہ سال مست ملک اٹی ہرا دہشت گردی ئسک اینو او حالیت آتے ٹی گچینی ارے یا آخا۔
