پاکستان اقتصادی استحکام ءَ پد دیمروئی ءِ نوکیں پڑ ءَ داخل بوھگ ءَ انت، دیمروئی ءِ شرح چار سال ءِ تہا مستریں تک ءَ سر بوتگ، وزیر خزانہ محمد اورنگزیب

اسلام آباد۔11جون  (اے پی پی): وفاقی وزیر خزانہ سینیٹر    محمد اورنگزیب ءَ گوشت کہ پاکستان ءَ گوستگیں لھتیں سال آنی تہ ءَ کسانیں اقتصادی چیلنج آناں گوں دیم پہ دیم بوھگ ءَ ابید ھم اقتصادی برجائی رستگ ءُ نوں ملک ءَ دیمروئی ءِ نوکیں پڑ ءَ رھادگ بوھگ ءِ بنیات ایر کتگ۔ وزیر ءِ ھزانگ ءَ راجی اقتصادی سروے 2025-26 پیش کنگ ءِ وھد ءَ گوشت کہ حکومت ءِ جوانیں اقتصادی پالیشی، مالیاتی نظم و ضبط، گہتری گامگیج ءُ سرمایہ کار آنی تہ ءَ گیشی ءِ سبب ءَ راجی معیشت ءَ جوانیں کارکردگی ءِ درشان کتگ۔ آئی ءَ گوشت کہ مالی سال 2025-26 ءَ ملک ءِ دیمروئی ءِ شرح 3.7درسد بوتگ کہ گوستگیں چار سال آنی تہ ءَ اے شرح گیش انت۔ آئی ءَ گوشت کہ مالی سال ءِ بندات ءَ جھان ءِ تجارتی جاور ھال، مون سون ءِ ھئور ءُ گیش بوھوکیں دمگی کشی آنی سبب ءَ چیلنج است اَت، بلے حکومتی کنٹرول ءُ اقتصادی ڈسپلن ءِ سبب ءَ معیشت برجاھ بوتگ ءُ سرمایہ کار آنی اعتماد بحالی بوتگ۔ محمد اورنگزیب ءِ رد ءَ پاکستان ءِ معیشت ءِ کساس 452.1 ارب ڈالر (126.9 ٹریلین کلدار) ءَ سر بوتگ وھدے کہ فی کس ءِ آمدنی 1751 ڈالر ءَ چہ 1901 ڈالر ءَ سر بوتگ۔ آئی ءَ گوشت کہ اگاں میاں اوستمانی تک ءِ کش ءُ چیل ءُ ایندگر درائیں چیز کارآمد نہ بوتین انت گڈا دیمروئی ءِ شرح 4.5درسد ءَ چہ گیش بوت کنت۔ وزیر ءِ ھزانگ ءَ گوشت کہ کشت ءُ کشاری ءِ شوبگ ءَ سرجمی ءَ گیشی 2.8درسد بوتگ، وھدیکہ فصل ءِ شوبگ ءَ 1.4درسد ءِ جوانیں گیشی ریکارڈ کنگ بوتگ۔ آئی ءِ رد ءَ مال ءُ مڈی زرعی معیشت ءِ مستریں شوبگ اِنت ءُ زرعی جی ڈی پی ءِ تہ ءَ ایشی ءِ بھر ءُ بانگ 63درسد ءِ کساس ءَ اِنت۔ صنعتی شوبگ ءِ ھوالگ ءَ آئی ءَ گوشت کہ مزنیں کساس ءَ صنعت آنی تہ ءَ 6درسد ءِ دیمروئی بوتگ کہ گوستگیں چار سال آنی تہ ءَ اے درستاں چہ گیش انت۔ آئی ءَ گوشت کہ معیشت ءِ وشھالی ءِ پائدگ معیشت ءِ جتاجتائیں شوبگ آنی تہ ءَ جوانیں رنگ ءَ گندگ بوھگ ءَ اَنت ءُ اے وشھالی ٹھکیں بنیات آنی سر ءَ ایر اِنت۔ وفاقی وزیر خزانہ ءَ اے جزم ءِ درشان کت کہ حکومت اقتصادی استحکام ءَ را برجائی ءِ تہ ءَ بدل کنگ، سرمایہ کاری ءَ را گیش کنگ، برآمدات ءَ را دیمروئی دیگ ءُ السی وشھالی ءَ را دل یکیمی کنگ ءِ واستہ اصلاحات آنی سلسلہ ءَ را برجاہ دار ایت۔