پی ایم ایل (ن) و پی پی پی نا ڈل آتا اوڑدہی، گلگت بلتستان اٹی حکومت جوڑ کننگ نا بابت سلاہ  تیا غور

گلگت۔ 11 جون (اے پی پی ) پاکستان مسلم لیگ (ن) نا بڑزکو کہولی ڈل اتون پاکستان پیپلزپارٹی (پی پی پی ) نا بڑزکو کہولی ڈل اوڑدہی کرے ہراٹی گلگت بلتستان اٹی بروک آ حکومت جوڑ کننگ نا بابت چندی سلاہ تیا سرجمی اٹ سجفنگا۔ پاکستان مسلم لیگ (ن) نا ڈل اٹی بنجائی وزیر امور کشمیر ، گلگت بلتستان و سیفران انجینئر امیر مقام و صدر مسلم لیگ (ن) گلگت بلتستان حافظ حفیظ الرحمان اوار ئسر، وخت اس کہ پاکستان پیپلزپارٹی نا ڈل اٹی مسکوہی بنجائی وزیر و سینئر راہشون قمر زمان کائرہ، سینئر وزیر سندھ شرجیل انعام میمن، مسکوہی چیئرمین سینیٹ نیئر حسین بخاری، صدر پیپلزپارٹی گلگت بلتستان امجد حسین ایڈووکیٹ و سندھ انا وزیر بلدیات سید ناصر حسین شاہ ئسک شریک ئسر۔ گلگت نا اسہ ہندی ہوٹل اٹی اوڑدہی ٹی ہڑتوم آ جماعت آتا راہشونک گلگت بلتستان نا ساڑی آ سیاسی حالیت و بروک آ حکومت جوڑ کننگ نا چندی پلو آتیا گپ وتران کریر۔ داوخت آ چندی سلاہ تیا سجفیر و سلابت نا عمل ءِ مون آ دننگ آ امنا کننگا۔ ہڑتوم آ ڈل آک داہیت آامنا کریر کہ حکومت جوڑ کننگ نا بابت سلاہ تا جاچ ءِ تینا تینا جماعت آتا گلگت بلتستان و مرکزی سرکڑدہ غاتے پت اٹی ہلسا کننگک، اوکان پد آخبت نا لائحہ عمل نا تعین ءِ کننگک۔