اسلام آباد ۔ 28 اکتوبر (اے پی پی) چیئرمین سینیٹ محمد صادق سنجرانی پارینے کہ پاکستان و آسٹریلیا اہم جہانی معاملہ غاتا بابت اسہ وڑ موقف اختیار کرینو ، گوادر ڈیہہ نا رابطہ کاری ٹی اہم ءُ کڑد اس ادا کیک، مقبوضہ کشمیر اٹی مرغن انگا کرفیو آن انسانی تنکی ودی مسنے، جہانی برادری مقبوضہ کشمیر نا حالیت آتا دمدستی نوٹس ءِ ہلے ۔ داخیال آتا درشانی ءِ او دوشنبے نادے آ آسٹریلین ہائی کمشنر ڈاکٹر جیوفیری شاکی تون اوڑدہی ٹی کرے ۔ اوڑدہی ٹی تین پہ تینی است خواہی نا معاملہ غاتیا گپ و تران و ہڑتوم آ کنڈآتا کمکاری ءِ مون آ دننگ آ امنا کننگا ۔ چیئرمین سینیٹ پارے کہ حکومت و پارلیمنٹ نا کہول آ پاکستان و آسٹریلیا نا گچین تعلقداریک ءُ، ہڑتوم آ ملک آتا نیام اٹ پارلیمانی کمکاری ءِ پین مون آ دننگ نا گرج ءِ ۔ اوپارے کہ پاکستان و آسٹریلیا اہم جہانی معاملہ غاتا بابت اسہ وڑنا موقف اختیار کرینو، ہڑتوم آ ملک آتا نیام اٹ واپاری کمکاری و زرکاری ٹی ودکی نا گرج ءِ ، تعلیم و خاص وڑاٹ انجینئرنگ نا بشخ اٹی ساڑی مثالی کمکاری ءِ پین سوگوی تننگ مریک ، پاکستان و آسٹریلیا نا نیام اٹ تعلیم، کانڑ کنی و ایلو بشخ آتے ٹی کمکاری ءِ ودفنگ نا گنجائش ارے ۔ چیئرمین سینیٹ پارے کہ گوادر ڈیہہ نا رابطہ کاری ٹی اہم ءُ کڑد اس ادا کیک ۔ آسٹریلیا نا زرکارآک گوادر اٹی چندی بشخ آتے ٹی زرکاری کننگ کیرہ ۔ گوادر نا ماسٹر پلان منظور مسنے شونداری عمل ترندی اٹ برجاءِ، ۔ اوپارے کہ ادارہ جاتی کمکاری وخت انا اہم ءُ گرج اسے ۔ چیئرمین سینیٹ آسٹریلین ہائی کمشنرءِ مقبوضہ کشمیر ناحالیت آتا بارواٹی معلومدار کرسا پارے کہ کرفیو آن انسانی تنکی اس ودی مسنے ۔ جہانی برادری مقبوضہ کشمیر نا حالیت آتا دمدستی نوٹس ہلے ۔ بھارت انسانیت نا برخلاف ڈوہ تیٹی اوار ءِ ۔ اوڑدہی ٹی آسٹریلین ہائی کمشنر پارے کہ ویل انا پرامن ایسر مذاکرات اٹ مننگ کیک ۔ آسٹریلیا کانڑ کنی و چندی بشخ آتے ٹی کمکاری ءِ مون آ دننگ نا خواہندار ءِ ۔
