ننکانہ صاحب ۔ 28 اکتوبر (اے پی پی) وزیراعظم عمران خان باباگرونانک یونیورسٹی نا بنداو ءِ تخانے ہراڑان سکھ برادری تون کروک آ اسہ پین وعدہ اس پورو مریک ۔ دوشنبے نادے آ داڑے بابا گرونانک یونیورسٹی نا بنداوی دود اس اڈ ہلک ہراٹی وزیراعظم عمران خان ، گورنر پنجاب چوہدری محمد سرور ، وزیراعلیٰ پنجاب عثمان بزدار ، بنجائی وزیر داخلہ اعجاز شاہ و وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان آن بیدس اہم شخصیت آک ساڑی ئسر ۔ داوخت آ وزیراعظم ءِ بابا گرونانک یونیورسٹی نا بابت سرجم حوال تننگا ہراٹی پاننگاکہ بابا گرونانک یونیورسٹی 107ایکڑ رقبہ غا محیط مریک ۔ پنجاب حکومت یونیورسٹی نا تفنگ کن بنائی فنڈ جاری کرینے ۔ یونیورسٹی ءِ جہانی آب انا یونیورسٹی اس جوڑ کننگک ہراٹی پنجابی و خالصہ بولی ٹی ساڑی آ دور انا غٹ پوسکن آ علم انا تعلیم تننگک ۔ یونیورسٹی ٹی طالب علم آتا رہینگ انگ کن ہاسٹل ہم تفنگک ۔
