وزیراعظم عمران خان نا بابا گرونانک یونیورسٹی نا بنداو ءِ تخنگ نا دود آن تران

غٹ اسٹ مرسا مارچ اتون اوار انتس کہ کیر ہراوخت اسکان زندہ اُٹ ہچ کس ءِ این آر او ملیپک، وزیراعظم عمران خان

ننکانہ صاحب ۔ 28 اکتوبر (اے پی پی) وزیراعظم عمران خان پارینے کہ بیشک غٹ اسٹ مرسا مارچ اتون اوار انتس کہ کیر ہراوخت اسکان زندہ اُٹ ہچ کس ءِ این آر او ملیپک، مدینہ نا ریاست ہنداخاطران سرسہب ریاست تصور مریک انتئے کہ ہموڑے کانود نا حکمرانی ئس، طبقاتی نظام و مراعات یافتہ تپہ غاتا مننگ تون ملک مون آ ہِننگ کپک، اقامہ منی لانڈرنگ نا اسہ وڑوڈول اسے، وزیراعظم گچین مننگ آن پد تینا اولیکو تقریر اٹی پاریسٹ کہ اسہ وخت اس بریک ہراتم ملک انا غٹ کرپٹ مافیا غاک یکجا مریرہ، ورلڈ بینک انا رپورٹ اٹی پاننگانے کہ کاروباری آسانی ودی کننگ نا بابت پاکستان برصغیر اٹی اول و دنیا ٹی پنچ میکو نمبر آ بسنے، تینا غٹ وسیلہ غاتے تعلیم آ خڑچ کینہ انتئے کہ علم انا بنداو آ زرگزران ءِ استوار کننگ آن ہی ملک شون ہلیک، تعلیم آن بیدس اسہ راج اس ہم شون ہلنگ کپک، بھلا بھلا درگاہ تتون اخس کہ اوقاف نا ڈغارک ءُ اوفتیا یونیورسٹی جوڑ کینہ، ننے آن داہریفنگاکہ انت نی نواز شریف نا زند انا ضمانت ءِ تننگ کیسہ ای تو پاوہ کہ ای تینا زند انا ہم ضمانت ءِ تننگ کپرہ ۔ نن نواز شریف ءِ گچین طبی آسراتی تا فراوانی ءِ المی کرین ۔ داخیال آتا درشانی ءِ وزیراعظم عمران خان دوشنبے نادے آ بابا گرونانک یونیورسٹی نا بنداو ءِ تخنگ نا دود آن تران کرسا کرے ۔ وزیراعظم آجوئی مارچ انا بابت پارے کہ وزیراعظم گچین مننگ آن پد تینا اولیکو تقریر اٹی او دا پیش گوئی کریسس کہ اسہ وخت اس بریک ہراتم ملک انا غٹ کرپٹ تپہ یکجا مریرہ ۔ اوپارے کہ مہالو چارٹرڈ آف ڈیموکریسی آ دستخط مس ہراٹی مستین نا حکمرانک ملک انا وام تے 6 ہزار ارب آن 30 ہزار ارب اسکان سرکریر ۔ ننا حکومت برسر اقتدار برسا تینا نیمہ خراج ریونیو اوڑکن کروک وام تا قسط آتے ادا کننگ آ خڑچ کرے ۔ اودے سما اس کہ دا ملک ءِ کنگال کرسا ہلانو ۔ واپاری و کرنٹ اکاءونٹ نسخان اٹی بے کچ ودکی مس ۔ وزیراعظم پارے کہ درملکی ادارہ و آئی ایم ایف تون اوار اینو غٹ پاننگ ءُ کہ پاکستان اصلاحات نا کمک اٹ ملکی زرگزران ءِ سوگو کرینے ۔ اوورلڈ بینک انا رپورٹ نا حوالہ ءِ ترسا پارے کہ ورلڈ بینک انا رپورٹ اٹی پاننگانے کہ پاکستان کاروباری آسانی ودی کرینے ۔ دا بابت برصغیر اٹی پاکستان اول و دنیا ٹی پیچ میکو نمبر آ بسنے ۔ آجوئی مارچ کروک آتے ساڑی حکومت نا سرسہب مننگ نا خلیس ءِ ۔ انت سوب ءِ کہ دا وزیراعظم آن استیفہ ہلنگ کن بننگ ءُ، جاگہ اس دا پارہ کہ دا یہودی لابی ءِ، جاگہ اس پارہ کہ یہودی کوزہ کننگ کن بننگ ءُ و جاگہ اس دا قادیانی تا ہیت ءِ کیرہ و جاگہ اس کبینی نا ذکر ءِ کیرہ ۔ اوپارے کہ تاریخ ءِ ہرفبو ہربو پی ٹی آئی نا اولیکو سال اٹی غٹ آن کم کبینی مس ۔ ویل بیرہ دادے کہ اوغٹ ءِ سماءِ کہ او اوفک ہراوڑ ملکءِ ہڑتوم آ دوتے اٹ پلانو ۔ وزیراعظم پارے کہ اوفتیا مقدمہ غاتے ننا دور اٹی جوڑ کننگتنے ۔ دا اقامہ نا ہیت ءِ کیرہ ہالانکہ اقامہ منی لانڈرنگ نا اسہ وڑوڈول اسے ۔ وزیر خارجہ و وزیر خزانہ ہم پین ملک اسے نا اقامہ دوئی کریسر ۔ اگہ کس اسے تون اقامہ مرے تو اونا منی لانڈرنگ نا ریکارڈ داخاطران ملیپک انتئے کہ دا پاکستان نا شاری سرپند کننگپسہ، بلکن دا پین ملک اسے نا شاری سرپند کننگارہ ۔ وزیراعظم دوٹوک وڑاٹ پارے کہ بے شک غٹ یکجا مرسا مارچ کیر و انتس کہ کیر ہراوخت اسکان زندہ اُٹ اوفتے این آر او ملیپک ۔ اوپارے کہ مستین اٹی اِرا این آر او تننگا ۔ اسہ پرویز مشرف اودے سعودی عرب آ گدریفے و ایلو آصف زرداری ءِ تننگا ۔ اوپارے کہ اوفتا شاہ خڑچی تا سوب آن روپئی نا قدر اٹی کمتی بس و ڈالر نا قدر ودا و درآمدی گڑاک کبین مسر ۔ وزیراعظم یونیورسٹی نا بنداو آ وزیراعلیٰ پنجاب و وزیر داخلہ ءِ مبارکباد ترسا پارے کہ نم بابا گرونانک نا 550 می ودی دے آ عملی گام گیج ہرفیرے ۔ اوپارے کہ دنیا نا تاریخ اٹی تعلیم آن بیدس اسہ راج اس ہم شون ہلتنے ۔ ننا بدبختی دادے کہ اسہ وخت تعلیم نا پڑاٹی مچ آ ڈیہہ ٹی غٹ آن مون آ ئس ولے ولدا نن تعلیم ءِ اولیت تتون و داسہ نن پدی سلیسونن ۔ اوپارے کہ یونیورسٹی نا قیام اسہ بھاز بھلو گام گیج اسے ۔ انشاء اللہ دا ہندن ءُ یونیورسٹی اس مریک ہراٹی دنیا نا خلقت و ہندی خلقت سائنس و ٹیکنالوجی و انفارمیشن ٹیکنالوجی نا جدید تعلیم دوئی کننگ کیرہ ۔ اووزیراعلیٰ پنجاب ءِ پارے کہ اوقاف نا ہرا ڈغار تیا کوزہ مسنے و دارداٹ وڈی خوری مننگ ءِ ۔ بابا فرید نا مزار اتون ڈغار تون اوار ایلو بزرگ آتا مزار آتون یونیورسٹی و ہسپتال جوڑ کننگے ۔ اوپارے کہ بابا برید ، بلھے شاہ ، داتا صاحب و میاں محمد بخش کون آ اولیا کرامک انسانیت نا خذمت ءِ کریر و انسان تا محبت نا درس تسر ۔ خواجہ ﷺ دنیا غان رخصت کرے تو اونا آخریکو پونجی ءِ ہم خلقت اٹی بشخنگا ۔ مدینہ غا ہنبو ہبو کہ خلقت خواجہ ﷺ تون اخہ در مہر و مریبت کیرہ ۔ کرتا پور و ننکانہ صاحب نا حیثیت سکھ برادری کن ہمودے ہرا ننکن مدینہ و مکہ نا ءِ ۔