بلوچستان اٹی ٹی بی نا چٹفنگ و اونا درمان نا گچین آسراتی تا فراوانی حکومت نا اولیت آتے ٹی اوار ءِ ، طبی چاہندار آک

کوءٹہ ۔ 27 اکتوبر (اے پی پی) طبی چاہندار آک پارینو کہ بلوچستان اٹی ٹی بی نا چٹفنگ و اونا درمان نا گچین آسراتی تا فراوانی حکومت نا اولیت آتے ٹی اوار ءِ ، ہندا وخت ءِ کہ نن تینا غٹ تر توانائی تے یکجا و وسیلہ غاتے کاریم اٹ اتسا دا مرض آن خلاصی کن گچین گام گیج کین، داہیت ءِ بنجائی منسٹری نا ڈاکٹر اعجاز قدیر، ٹی بی کنٹرول بلوچستان نا صوبائی منیجر ڈاکٹر احمد ولی ، ورلڈ ہیلتھ آرگنائزیشن نا ڈاکٹر خواجہ لیق احمد، نیشنل ٹی بی کنٹرول پروگرام نا ڈاکٹر اورنگزیبقادر، ڈاکٹر عبدالغفور و ڈاکٹر حسین عادی یک شنبے نادے آ ہندی ہوٹل اٹی صوبائی ٹی بی کنٹرول پروگرام محکمہ جان جوڑی بلوچستان نا کنڈآن و ورلڈ ہیلتھ آرگنائزیشن پاکستان نا کمک اٹ اِرادے ئی سٹریٹجکی پلان سلابتی ورکشاپ تدارک ٹی بی نا ایسری سیشن آن تران کرسا پاریر ۔ ورکشاپ نا مسخت ٹی بی نا توننگ و 4سالہ حکمت عملی اس جوڑ کننگ درمان نا بابت ئس حکمت عملی جوڑ کننگ کن چندی ادارہ غاتا چاہندار آتے بلوچستان و ایلو صوبہ غاتیان بٹنگ انگاسس ورکشاپ اٹی چاہندار آک تینا تکنیکی آراء پیش کریر ، ورکشاپ آن ڈاکٹر اعجاز قدیر ، ڈاکٹر احمد ولی ، ڈاکٹر خواجہ لیق احمد، ڈاکٹر اورنگزیب قادر، ڈاکٹر عبدالغفور و ڈاکٹر حسین عادی ئسک تران کرسا پاریر کہ صوبائی ٹی بی کنٹرول پروگرام بلوچستان نا اسٹریٹجک پلان نا تیاری نا مسخت اقوام متحدہ نا اولیکو بڑزکو کہول انا میٹنگ اٹی ٹی بی نا چٹفنگ نا عزم ءِ مون آ تخسا محکمہ جان جوڑی حکومت بلوچستان نا ٹی بی نا چٹفنگ کن گچین درمان و توننگ ، موثر پالیسی نا ٹہیفنگ و پوسکن آ پٹ وپول کن مناسب وسیلہ غاتا دوئی کننگ کن تینا پبی کڑد ءِ ادا کننگ نا عزم کروئی ءِ ۔ اوپاریر کہ بلوچستان اٹی ٹی بی نا چٹفنگ و اونا درمان نا گچین آسراتی تا فراوانی اولیت آتے ٹی اوار ءِ ہنداوخت ءِ کہ نن دامرض آن خلاصی کن گچین گام گیج کین، اوپاریر کہ دا عزم انا تجدید ءِ کینہ کہ ہلوک آ مرض آتے کنٹرول کننگ کن و الس نا زند انا آب ءِ گچین کننگ کن غٹ تر وسیلہ غاتے کاریم اٹ اتینہ ٹی بی کنٹرول پروگرام ءِ پین سوگو کننگ کن فنڈ آتا بابت پورو خود انحصری نا کنڈآ رون کروئی مریک، داڑتون اوار اوار نجی ادارہ غاتون شریداری ءِ ودفنگ و ایلو محکمہ غاتون گچین ہم گرنچی ودی کننگ نا گرج ءِ ۔