وزیراعظم عمران خان نا کشمیر آ بھارت نا غاصبانہ کوزہ نا بابت تہار دے انا وخت آ ویڈیو کلہو اٹی گپ و تران

اسلام آباد ۔ 27 اکتوبر (اے پی پی) وزیراعظم عمران خان پارینے کہ پاکستان کشمیری الس نا سیاسی ، سفارتی و اخلاقی مخ تفی ءِ برجاتخک، کشمیر نا سفیر تون اوار اونا ترجمان و وکیل ہم مریوہ ، سلامتی کونسل آن کشمیری تے اوفتا حق خودارادیت ہرحال اٹ ترفنہ، حق خوداداریت نا دوئی کننگ اسکان کشمیری تون اوار سلنہ ۔ یک شنبے نادے آ مقبوضہ جموں و کشمیر آ بھارت نا جابرانہ و غاصبانہ فوج کشی نا بابت تہار دے انا وخت آ تینا ویڈیو کلہو اٹی وزیراعظم پارے کہ اینو ہمو تہار دے ءِ ہراتم 72سال مست بھارت تینا فوج ءِ کشمیر اٹی شیف کرے ، ہمووخت نا بھارتی وزیراعظم جواہر لال نہرو اقوام متحدہ ٹی تینٹ دا ویل ءِ ہرفے درے، سلامتی کونسل فیصلہ تس کہ کشمیری پاکستان یا بھارت تون رہینگ انگ نا فیصلہ ءِ تینٹ کیر ولے کشمیری تے اینو اسکان دا حق ملتنے، کشمیری الس ءِ چندی وڑتے اٹ درو تننگا، مقبوضہ دامان اٹی دھاندلی زدہ گچین کاری تا کمک اٹ کشمیری تے ورغلاءفنگ نا کوشست کننگا، 30 سال مست ہم ہندن ءُ اسہ دھاندلی زدہ گچین کاری اس مس ، دھاندلی زدہ گچین کاری تا برخلاف کشمیریک روڈ آتیا پیش تمار ۔ وزیراعظم پارے کہ حق خودارادیت نا دوئی کننگ کن داوخت اسکان اسہ لکھ کشمیری شہید مسنو ۔ نریندر مودی الیکشن ءِ کٹسا 5اگست آ مقبوضہ کشمیر اٹی کرفیو خلک، ہچ کس ءِ ہچ سما اف کہ داوخت آ کشمیر اٹی انت مننگ ءِ، تہار دے کشمیر اڈتننگ نا مسخت کشمیری تے کلہو تروئی ءِ کہ پاکستان اوفتے تون ءِ، پاکستان ہر فورم آ کشمیری تا مخ تفی ءِ برجاتخک ، ہر چار آ صوبہ و غٹ اقلیت آک کشمیری تتون تفوک ءُ، پاکستان مدام کشمیری تتون سلک ۔ اوپارے کہ سلہہ ہرفنگ نا ہیت ءِ کروک آک کشمیری و پاکستان تون دشمنی کننگ ءُ، بھارت ہندا خواہک کہ پلوامہ کون ءُ واقعہ اس مرے و او پاکستان آ جلہو کے ۔ مودی حکومت واقعہ سے بہانہ جوڑ کرسا کشمیری تیا ظلم و ستم ءِ نا مش اس پرغنگ خواہک، نن کشمیری تا اخلاقی ، سفارتی و سفارتی وڑاٹ کمک ءِ کروئی ءِ ، کشمیری تا تحریک ءِ داسہ ہچ کس توننگ کپک ۔