چیئرمین سینیٹ محمد صادق سنجرانی نا یوم سیاہ نا وخت آ بیان

بھارتی فوج 72سال آن انسانی حق انا خلاف ورزی تیٹی اوار، مقبوضہ کشمیر اٹی ظلم و جبر برجاءِ

اسلام آباد ۔ 27 اکتوبر (اے پی پی) چیئرمین سینیٹ محمد صادق سنجرانی پارینے کہ بھارتی فوج 72سال آن انسانی حق انا خلاف ورزی تیٹی اوار مسنے، مقبوضہ کشمیر اٹی 7 دہائی آن ظلم و جبر مننگ ءِ ، نن امن نا ہیت کینہ وخت اس کہ بھارت ڈیہہ ءِ خاخر اٹ بٹنگ ءِ ، مودی سرکار 5 اگست نا اسہ کنڈی گام گیج کرسا جہانی کانود آتے نت تا کیرغ لتاڑانے ۔ داخیال آتا درشانی ءِ او مقبوضہ جموں و کشمیر آ بھارت نا غاصبانہ کوزہ نا برخلاف یوم سیاہ نا وخت آ یک شنبے نادے آ تینا بیان اٹی کرے ۔ اوپارے کہ پاکستان ہر فورم آ کشمیری تیکن توار ہرفینے ۔ چیئرمین سینیٹ پارے کہ مقبوضہ کشمیر اٹی مریس کرفیو تشدد و دہشت گردی نا بدترین مثال ءِ ، بھارت ءِ ڈیہہ نا شونداری و اوٹی پاکستان نا کڑد آن تکلیف مننگ ءِ ۔ پاکستان ڈیہہ ٹی امن نا کوشست آتا مخ تفی ءِ برجاتخک ۔ اوپارے کہ مقبوضہ دامان داوخت جیل اسے نا منظر ءِ پیش کننگ ءِ ، جابرانہ حراست و کرفیو نا چرجوئی ءِ بند کننگے ۔ اوخواست کرے کہ جہانی برادری ہم دوہرا معیار ءِ ہلے و اقوام متحدہ نا قرارداد و جہانی کانود نا رداٹ کشمیر نا ویل ءِ ایسر کرفنگ اٹ تینا کڑد ءِ ادا کے ۔