بھارت زیات وخت اسکان جہانی برادری ءِ گمراہ کننگ کپک، مقبوضہ کشمیر اٹی برجا بھارتی ظلم ءِ پڑدہ کننگ مفک، مخدوم شاہ محمود قریشی

اسلام آباد ۔ 27 اکتوبر (اے پی پی) وزیر خارجہ مخدوم شاہ محمود قریشی پارینے کہ بھارت زیات وخت اسکان جہانی برادری ءِ گمراہ کننگ کپک و مقبوضہ کشمیر اٹی برجابھارتی ظلم ءِ پڑدہ کننگ مفک ۔ یک شنبے نادے آ یوم سیاہ کشمیر نا وخت آ تینا کلہو اٹی وزیر خارجہ پارے کہ بھارت مقبوضہ وادی ٹی دہشت گردی نا گام گیج کننگ ءِ ، ہراڑاجہانی برادری ءِ چکار کروئی مریک ۔ اوپارے کہ بھارت نا سنگت و مخالف آک ہم داسہ اوڑا تنقید کننگ ءُ وخت اس کہ مچ آ جہانی میڈیا یکجہتی اتون بھارت نا شرمناک جمہوریت و جعلی بریبری ءِ پاش کننگ ءُ ۔ وزیر خارجہ مستی پارے کہ نن مقبوضہ جموں و کشمیر نا تینا ایڑھ ، ایلم تا سیاسی، اخلاقی و سفارتی مخ تفی ءِ برجاتخنہ ۔ اواقوام متحدہ نا سلامتی کونسل نا قراردادآتا رداٹ کشمیری تا حق خودارادیت نا روا جہد نا پوروی اسکان مخ تفی ءِ برجاتخنگ نا عزم انا درشانی ءِ کرے ۔ شاہ محمود قریشی پارے کہ اینو نا دے 72سال مست بھارتی فوج کشمیری آ کوزہ کرے، اونا دا گام گیج جہانی کانود نا کھلم کھلا خلاف ورزی ئس ۔ اوپارے کہ 5 اگست آ بھارت تینا غیر کانودی و غیر آئینی گام گیج آتا کمک اٹ کشمیرنا جغرافیائی و آبادیاتی حیثیت ءِ بدل کننگ نا کوشست کرینے ۔ ، اوپارے کہ کم وو د 3تُو انا خڑک وخت آن بھارت کشمیری تے اوفتا اُراتیٹی بند کرینے و او تینا ہی گل زمین آ بے وطن ءُ ۔ بھارت مچ آ مقبوضہ کشمیر ءِ جیل اٹی بدل کرینے ۔ وزیر خارجہ پارے کہ مقبوضہ کشمیر اٹی جاری بھارتی ظلم اتون کشمیریک جیرت و دلیری اٹ مون تسنو ۔ اوتینا کشمیری ایڑھ و ایلم تے باورکرفسا پارے کہ اوفتا حق خودارادیت نا جہد سرسہبی اٹ ہمکنار مریک ۔