نریندر مودی تینا اقتصادی بے سہبی تیان الس نا چکار ءِ اسہ کنڈ کننگ کن مقبوضہ کشمیر اٹی است ہسون ظلم آتا چرجوئی ءِ برجاتخانے، سینیٹ اٹی بلوچستان عوامی پارٹی نا پارلیمانی لیڈر سینیٹر انوارالحق کاکڑ نا اے پی پی تون گپ وتران

کوءٹہ ۔ 27 اکتوبر (اے پی پی) سینیٹ اٹی بلوچستان عوامی پارٹی نا پارلیمانی لیڈر سینیٹر انوار الحق کاکڑ پارینے کہ نریندر مودی تینا اقتصادی بے سہبی تیان الس نا چکار ءِ اسہ کنڈ کننگ کن مقبوضہ کشمیر اٹی است ہسون ظلم آتا چرجوئی ءِ برجاتخانے، ڈیہہ نا امن و شونہالی کن کشمیر نا ویل انا ایسری قوام متحدہ نا قرارداد آتا رداٹ ایسر مننگ المی ءِ، مقبوضہ کشمیر نا بے مثل تحریک آجوئی ءِ توننگ بھارت نا وس انا ہیت اس اف، داہیت انا درشانیءِ او یک شنبے نادے آ ایسوسی ایٹڈ پریس آف پاکستان تون خصوصی گپ و تران کرسا کرے ۔ سینیٹر انوار الحق کاکڑ پارے کہ بھارت نا جابرانہ چم بازی تا سوب آن مقبوضہ دامان کشمیر اٹی انسانی المیہ ودی مننگ ءِ پنچ اگست آن جاری مروک آ بلیک آءوٹ، دوائی، خور انا کاختی و کرفیو آن پد ہم ہندوستان کشمیری تا جوزہ حریت ءِ شکست تننگ اٹ بے سہب مسنے، اقوام متحدہ ٹی وزیراعظم عمران خان نا تقریر کشمیر نا ویل ءِ جہانی کہول آ تالان کرینے، مودی نا انسانیت کش گام گیج آتیان ڈیہہ نا سلامتی ءِ سنگین خطرہ مون تروک ءِ داسہ تو مودی نا انسانی حق آتا خلاف ورزی آ تینٹ بھارت نا تہہ آن مودی نا برخلاف توار بش مننگ ءِ، سینیٹر انوار الحق کاکڑ پارے کہ بھارتی سرکار نا ظالمانہ گام گیج آتیا پاکستان نا غٹ جماعت آک تینا اختلاف آتے اسہ کنڈ تخسا کشمیری تا بدل مفروک مخ تفی نا درشانی ءِ کرینو و اینو بلوچستان نا خلق خلق اٹی وزیراعظم عمران خان و وزیراعلیٰ بلوچستان جام کمال خان نا پارت آتیا کشمیری تتون یکجہتی نا درشانی کن پبی پروگرام اڈتننگ انگ ءِ ، اوپارے کہ بھارت مون انگا کانود ءِ نافذ کننگ آن پد مچ آ مقبوضہ کشمیرنا وادی ءِ جیل اٹ بدل کرینے ولے لاک ڈاءون ، کرفیو خلنگ و مواصلاتی نیٹ ورک آ پابندی خلنگ آں تنازعہ کشمیر و حریت پسند کشمیری تا توار ءِ توننگ مفک ہنداخاطران ڈیہہ ٹی پائیدار امن کن اقوام متحدہ نا قرارداد آتا رداٹ کشمیری تے حق خودارادیت المی ءِ ۔