وزیراعظم نا خصوصی کمکار و بلوچستان اسمبلی ٹی پاکستان تحریک انصاف نا پارلیمانی لیڈر سردار یار محمد رند انا ’’اے پی پی‘‘ تون گپ و تران

کوءٹہ ۔ 27 اکتوبر (اے پی پی) وزیراعظم نا خصوصی کمکار و بلوچستان اسمبلی ٹی پاکستان تحریک انصاف نا پارلیمانی لیڈر سردار یار محمد رند پارینے کہ پاکستان نا الس نا است تینا کشمیری ایلم تتون اوار دھڑکک، بھارت اینخو سال 5 اگست 2019ء نا دے آرٹیکل 370 ءِ منسوخ کرسا کشمیری تیان اوفتا درستی راستی ءِ پلنگ نا کوشست کرے بھارت دا گندہ انگا عمل ءِ کرسا تینا لیڈر جواہر لال نہرو نا ہمو وعدہ ءِ ہم پرغا ہرا دے او اقوام متحدہ و تینا ملک اٹی چندی ہند آتیا کریسس ۔ دا وعدہ ٹی اوپاریسس کہ بھارت کشمیر اٹی رائے شماری کرفک ۔ رائے شماری تو وخت اس ہم کرفنگتو البتہ کشمیر ءِ بھارت نا اٹوٹ انگ ثابت کننگ نا کوشست ضرور کننگا ۔ بھارتی عمل آن ہراڑے اونا مکروہ دروشم دنیا نا مون آ بے نقاب مس تو ایلو کنڈ کشمیری تا توار ءِ مچ آ دنیا ٹی ہم بننگا، داخیال آتا درشانی ءِ او ’’اے پی پی‘‘ تون خصوصی گپ و تران کرسا کرے اوپارے کہ پاکستان مدام کشمیری تا حق خودارادیت کن دنیا ٹی توار بڑز کرسا کیک ولے 5 اگست آن پد آن تو پاکستان ہچ ءُ فارم اس الیتنے کہ کشمیری تا توار مچ آدنیا اسکان سرکننگپ وزیراعظم عمران خان جنرل اسمبلی نا پلیٹ فارم آ اسہ ہندن ءُ تقریر اس کرے ہراٹی او کشمیری تیا مروک آ ظلم ءِ دنیا نا مون آ پیدوار کرے وخت اس کہ اقوام متحدہ آن پد پاکستان انٹرپارلیمانی یونین اٹی ہم کشمیر نا ویل ءِ ہرفے و جہانی برادری آ زور شاغا کہ او مظلوم کشمیری تا حق خودارادیت ءِ المی کے اوپارے کہ پاکستان دنیا ءِ باور کرفینے کہ کشمیری تتون دا بدسلوکی ءِ چٹفنگ کن جہانی برادری بھارت آ بایدے زور شاغے کشمیر نا بابت پاکستان نا موثر موقف و گا م گیج آتا سوب داسہ دنیا ہم بھارت نا ظم آن معلومدار مسنے ہنداسوب ءِ کہ امریکی کانگریس نا خارجہ امور نا ذیلی کمیٹی نا گیشتر کانود ساز آک ہم مقبوضہ کشمیر آ بھارتی گام گیج آ سوج ہرفینو و مقبوضہ کشمیر نا ساڑی آ حالیت آتیا گڑتی نا ہم درشانی ءِ کرینو ، سردار رند پارے کہ داوخت آ ہم بھارت کشمیر اٹی انسانی حق انا سنگین خلاف ورزی تیٹی براہ راست اوار ءِ، بھارت تینا ظلم اٹی داخہ در مون آ ہنانے کہ کودک کشمیری تیا کروک آ ظلم آتے خنسا انسانیت ناکاٹم ہم شرم آن شیف مسنے، سردار رند پارے کہ سال 1989آن ہلیس داوخت اسکان بھارت نا مسلط فورس آک کم از کم اسہ لکھ کشمیری تے شہید کریر ہرافتیان 7ہزار 130 خلقت ہموفک ئسر ہرا دوران حراست دم تسر ۔ اگہ ہُننگے تو داوخت مقبوضہ جموں و کشمیر اسہ جیل اس جوڑ مسنے انتئے کہ ہموڑے ذراءع ابلاغ نا پابندی ، مواصلات نا نظام پورو بند و سیاست دان تے دزگیر کننگ انگ ءِ، بھارت کوشست کننگ ءِ کہ کشمیری تا توار ءِ توننگے تانکہ پیشن نا دنیا ءِ علم مننگ کپ او دامان اٹی انت ظلم کننگ ءِ اوپارے کہ ہندن پاکستان کشمیری تیا مروک آ ظلم انا برخلاف تینا توار ءِ بڑزک کیک تو ایلو کنڈ بھارت لین آف کنٹرول آ جارحیت نا بناءِ کیک ہراٹی او کودک شاری تے شست کیک و جہانی کہول آ پاکستان ءِ بدنام کننگ کن پاکستان نا برخلاف دروغم انا چم بازی ہم کیک ۔ کشمیری تتون یکجہتی نا درشانی کن جلسہ و ریلی تا بست و بند ءِ کننگ تون اوار اوار بھارت ءِ داکلہو ہم تننگے کہ پاکستان کشمیری تیا مروک آ ظلم آن بھاز جوان بلد ءِ واو اخس کہ ظلم کے او کشمیری تیان اوفتا شناخت ءِ پلنگ کپک ظالم چائے اخس کہ واکدار مرے اونا ظلم ءِ زوال ضرور بریک و ظلم ہراتم حد آن گدرینگے تو چٹک ۔ پاکستان مدام کشمیر نا پرامن ایسری کن کوشست کرساکرینے پاکستان دا منک کہ سویلی ایشیا ٹی پائیدار امن کن کشمیر نا ویل ءِ اقوام متحدہ نا منظور مروک قرارداد آتا رداٹ ایسر مننگ بھاز المی ءِ و پاکستان نیک نیتی اتون کشمیر نا کیس ءِ کرسا اودے اوفتا آجوئی ءِ ترفک ، سردار یار محمد رند پارے کہ مچ آ ملک آنبار اینو مچ آ بلوچستان اٹی کشمیری تیا کروک آ ظلم آتیا یوم سیاہ اڈتننگ انگ ءِ و دا بھارت کن پیدوار کلہو اسے کہ کشمیر تون اوار قومی معاملہ غاتیا مچ آ پاکستانی قوم یکجاءُ و نن تینا شہ رگ کشمیر ءِ ہر کہول آ اخلاقی و سفارتی مخ تفی ءِ برجاتخنہ ۔