اقتصادی ہدف آتا دوئی کن ادارہ غاتا کاریم اٹی ہم آہنگی بھاز اہمیت تخک، سینیٹر اسحاق ڈار
اسلام آباد۔ 10 فروری (اے پی پی) بنجائی وزیر خزانہ سینیٹر اسحاق ڈار پارینے کہ اقتصادی ہدف آتا دوئی کن ادارہ غاتا کاریم اٹی ہم آہنگی بھاز اہمیت تخک ہراڑآن مچ آ ملک فائدہ ہرفک۔ او جمعہ آ داڑے وزارت خزانہ ، سٹیٹ بینک آف پاکستان و فیڈرل بورڈ آف ریونیو نا نیام اٹ کوآرڈینیشن نا بابت بست وبند آتا جاچ ئِ ہلنگ کن اڈ ہلوک آ دیوان نا کماشی ئِ کریکہ۔ گورنر سٹیٹ بینک اشرف محمود وتھرا ، سیکرٹری خزانہ و ایف بی آر نا چیئرمین دیوان اٹی شرکت کرے و وزیر خزانہ ئِ تعلقدار ادارہ غاتا کنڈآن کوآرڈینیشن کن کروک آ گام گیج آتا بارواٹی معلومدار کرے۔ وزیر خزانہ دا گام گیج آتا ستائِ کرسا پارے کہ ادارہ غاتا نیام اٹ گچین ہم آہنگی حکومتی کاریم تے گچین وڑاٹ چلیفنگ کن المی ئِ۔ اودیوان نا ساڑی مروک آتیا زورشاغا کہ او کٹیا و خڑچ آتیان بابت گچین ایسری اس پٹنگ کن گام گیج کیر۔
