قطر ءِ راس لفان گیس کمپلیکس ءَ تراک بوتگ ، 54 ٹپیگ بوتگ ، 18 بیگواہ

دوحہ۔22جون  (اے پی پی): قطر ءِ بنجاھی شہر دوحہ ءِ شمال ءَ ایل این جی (مائع نیچرل گیس) ءِ پروسیسنگ سینٹر راس لفان انڈسٹریل سٹی ءَ تراک ءِ سبب ءَ 54مردم ٹپیگ بوتگ اَنت ءُ 18مردم بیگواہ بوتگ اَنت۔ بی بی سی ءِ رد ءَ قطر ءِ تہی کارانی وزارت ءَ وتی بیان ءَ گْوشتگ کہ تراک ءِ تہ ءَ 54 مردم ٹپیگ بوتگ اَنت ءُ 18 مردم بیگواہ اَنت ءُ پٹ ءُ پول برجاہ اِنت۔ بیان ءِ رد ءَ تراک تکنیکی حادثہ ءِ سبب ءَ بوتگ ءُ ایشی ءِ آسر ءَ ھچ وڑیں گیس ءِ ریلیز نہ بوتگ کہ چہ ایشی ءَ لس مھلوک ءِ جان سلامتی ءَ را ھترہ بہ بیت۔ وزارت داخلہ ءَ گشتگ کہ قطر انٹرنیشنل سرچ اینڈ ریسکیو گروپ سول ڈیفنس ٹیم ءِ گوما بیگواہیں مردمانی پٹ ءُ پول ءِ ھاتر ءَ کار کنگ ءَ انت۔ انتظامیہ ءِ رد ءَ راس لفان انڈسٹریل سٹی ءَ تکنیکی ردی ءِ سبب ءَ تراک ءُ پدا مزنیں کچے ءَ آتشزدگی بوتگ۔ کمپنی ءِ نیمگ ءَ جاڑی بوتگیں بیان ءِ تہ ءَ گْوشگ بیتگ کہ ایمرجنسی ٹیم زوت جاہ ءَ روان دیگ بوتگ اَنت ءُ کمیں وھد ءَ پد آتشزدگی ءِ گر ءُ دار کنگ بوتگ۔ سرکاری کمپنی قطر انرجی ءَ اے گپ نہ گشتگ کہ اے تراک ءَ چہ پلانٹ ءَ را ھچ وڑیں تاوان رستگ یا نہ۔ اے پلانٹ قطر ءِ دمگی بازار ءَ گیس ءِ سپلائی کنت۔ یک گواہے ءَ رائٹرز ءَ گوں تران کنان ءَ گْوشتگ کہ تراک ءِ توار دارالحکومت دوحہ ءَ ھم گوشدارگ بوتگ کہ راس لفان ءِ آسراتی ءِ جنوب ءَ اِنت۔