وزیراعلیٰ بلوچستان نا رابطہ سیکرٹری اسسٹنٹ سردار زادہ میر عمیر محمد حسنی نا کماشی ٹی یوم سیاہ کشمیر نا چرجوئی ٹی کوءٹہ پریس کلب نا مون آ برانزی مچی

کوءٹہ ۔ 27 اکتوبر (اے پی پی) وزیراعلیٰ بلوچستان نا رابطہ سیکرٹری اسسٹنٹ سردار زادہ میر عمیر محمد حسنی نا کماشی ٹی یوم سیاہ کشمیر نا چرجوئی ٹی یک شنبے نادے آ سٹیلاءٹ ٹاءون آن ریلی اس کشنگا و کوءٹہ پریس کلب نا مون آ برانزی مچی اس کننگا داوخت آ مچی ٹی بشخ ہلوک آک کشمیری الس تون یکجہتی نا درشانی کن کشمیر نا بیرک و بینرز ہرفیسر و بھارتی ظلم انا برخلاف نعرہ خلکورہ ۔ مچی آن سردار زادہ میر عمیر محمد حسنی ، علی محمد حسنی و حبیب الرحمان درانی ئسک تران کرسا پاریر کہ 27 اکتوبر 1947 و ہمو مون انگا دےءِ ہراتم بھارت کشمیر آ غاصبانہ کوزہ کرے ہرادے کشمیری الس اینو اسکان امنا کتنو و بھارتی جارحیت و کوزہ نا برخلاف 72سال آن جہد کننگ ءُ دا جہد اٹی اسہ لکھ آن زیات کشمیری داوخت اسکان تینا جان تے ندر کرینو لکھ آ چناک چوری و زالبول آک جنوزان مسنو ولے کشمیری الس نا حوصلہ نئے بیرہ اینو ہم بلند ءِ بلکن بھارت داسہ بوکھلاہٹ نا گواچی مسنے ۔ اوپارے کہ اولیکو دے آنبار اینو ہم مچ آ پاکستانی قوم کشمیری الس تون سلوک ءُ و او فتا آجوئی کن اوفتے تون تفوک ءُ ۔ اوفک پاریر کہ کشمیر اٹی بھارتی فوج انا ظلم کاٹم آن گدرینگانے ولے نن ہندوستان ءِ دا کلہو تننگ خوانہ کہ بھارت تینا غٹ تر ظلم آتیان پد ہم کشمیری الس ءِ اوفتا حق آجوئی آن محروم کننگ کپک کشمیر نا وتواجہ حیثیت ءِ چٹفسا دراصل بھارت مچ آ دنیا غا تینا مکروہ دروشم ءِ تینٹ بے نقاب کرینے و اونا دروشم آن جمہوریت نا نقاب دڑنگانے ۔ اوپارے کہ وزیراعظم عمران خان یو این اٹی ہراوڑ ملک انا نمائندگی ءِ کرسا کشمیری الس کن توار بڑز کرے او ناقابل فراموش ءِ ملک انا سیاسی و عسکری سرکڑدہ غاک کشمیری الس تون تفوک ءُ ۔ اوترکی نا صدر رجب طیب اردگان و ملائیشیا نا صدر مہاتیر محمد ءِ کشمیری الس کن توار بڑز کننگ آ خراج تحسین پیش کرسا پارے کہ نن کشمیری الس نا آجوئی اسکان اوفتے تون ہم کوپہ سلوک اُن ۔