سنٹر نا کمانڈنٹ بریگیڈیئر ریاض و کمانڈرون کور لیفٹیننٹ جنرل عمر فاروق درانی نا وزیر داخلہ ئِ بریفنگ
پبی/کھاریاں۔10 فروری (اے پی پی) وزیر داخلہ چوہدری نثارعلی خان جمعہ آ نیشنل کاﺅنٹر ٹیررازم ٹریننگ سینٹر پبی، کھاریاں نا دورہ ئِ کرے۔ وزیر داخلہ نیشنل انٹیگریٹڈ کاﺅنٹر ٹیررازم کورس 9 انا گریجوایشن دود اٹی بطور مہمان خاص مدعو ئس۔ کمانڈرون کور لیفٹیننٹ جنرل عمر فاروق درانی وزیر داخلہ ئِ دا دود اٹی خصوصی وڑاٹ ساڑی مننگ نا سلہ خلکوسس۔ سینٹر اٹی 2014ءآن کانود نافذ کروک آ ادارہ بشمول رینجرز، ایف سی و اسلام آباد، گلگت بلتستان پولیس تون اوار غٹ صوبہ غاتا پولیس نا ورناتے انسداد دہشت گردی نا خصوصی تربیت تننگک۔ 2014ءآن مست دا سینٹر کوئک رسپانس سینٹر پاننگاکہ۔ سینٹر نا کمانڈنٹ بریگیڈیئر ریاض و کمانڈرون کور لیفٹیننٹ جنرل عمر فاروق درانی وزیر داخلہ ئِ سینٹر اٹی بریفنگ ترسا پارے کہ سینٹر اٹی درملی فوجی تے ہم تربیت تننگک و دا سینٹر اٹی دہشت گردی نا انسداد کن المی مہارت آتا تربیت نا پوسکن آ آسراتی ہم ساڑی ارے۔ داوخت اسکان اِرا لکھ 15ہزار 412 کارندہ غاتے انسداد دہشت گردی نا تربیت تننگانے۔ بلوچستان پولیس تون اوار ایلو ادارہ غاتا 6955 کارندہ غاتے ہم انسداد دہشت گردی نا تربیت تننگا۔ چین، ترکی ، سعودی عرب، بحرین و مالدیپ تون اوار کیہی ملک آتا سیکورٹی کارندہ غاک ہم انسداد دہشت گردی نا تربیت دوئی کرینو و اونا چنکو وخت ئُ پاس اسے نا تربیتی کورس کرفنگانے۔ 2015 ءآن داوخت اسکان کیہی سروسز و ادارہ غاتا 3 ہزار 759 کارندہ غاتے کیہی کورس آتا تربیت تننگا۔ سینٹر اٹی انسداد دہشت گردی نا تربیت کن خاص بست و بند کننگانے۔ دافتے ٹی 1700 میٹر نا سنائپر رائفل شوٹنگ نا تربیت ہم اوار ئِ۔ وزیر داخلہ پارے کہ دا کورس پولیس و ایلیٹ فورس انا ہر ورناتے کن المی ئِ و دا سینٹر آ تربیت کن کیہی ادارہ غاتون گچین کوآرڈینیشن نا گرج ئِ تانکہ داڑے ساڑی انسداد دہشت گردی نا تربیتی آسراتی تیان زیات آن زیات فائدہ ہرفنگے۔ وزیر داخلہ ئِ پاننگانے کہ سینٹر آ سرچ و انٹیلی جنس بیسڈ آپریشن نا ہم خصوصی تربیت تننگک۔ جمعہ آ تربیت پورو کروک آ 386 ورناتیٹی نیوی نا 27، رینجرز نا 48، اے این ایف نا 4، ایف سی نا 50، کوسٹ گارڈ نا 20، ایس پی ڈی نا 40و بنجائی پولیس تون اوار پولیس نا 130 ورنااوار ئُ۔ اسلام آباد پولیس نا581 ورنا، گلگت بلتستان نا 166، آزاد جموں کشمیر پولیس نا 121، سندھ پولیس نا 140، سندھ رینجرنا 243، خیبر پختونخواپولیس نا 610، فرنٹیئر کور نا 838 ، پنجاب پولیس نا 480، ریورائن پولیس نا 668 و پنجاب رینجرنا 278ورنا 2014ءآن داوخت اسکان دا سینٹر آ چار ہفتہ غاتا دورانیہ آ تالان انسداد دہشت گردی نا تربیت دوئی کرینو۔
