وزیراعظم نا خصوصی کمکار امور نوجوانان عثمان ڈار نا دیوان آن تران

اسلام آباد ۔ 25اکتوبر (اے پی پی) وزیراعظم نا خصوصی کمکار امور نوجوانان عثمان ڈار پارینے کہ سرسہب ورنا پروگرام نا رداٹ وام ہلنگ کن مچ آ ملک آن تدوک آ اسہ ہفتہ ٹی 4لکھ 33ہزار 149 ورنا آن لائن درخواست آتے مون تسنو، درخواست تروک آتے ٹی 86درسد نرینہ و 14درسد نیاڑی ءُ ۔ داخیال آتا درشانی ءِ او قومی اسمبلی نا قائمہ کمیٹی خزانہ نا چیئرمین اسد عمر نا کماشی ٹی اسہ دیوان اسے ٹی گپ و تران کرسا کرے ۔ دیوان نا مسخت وزیراعظم عمران خان نا کنڈآن 17اکتوبر 2019ء آ سرسہب ورنا پروگرام و یوتھ انٹر پرینیور شپ اسکیم نا سرسہب بناکن تعلقدار ادارہ و اوفتا ٹیم تا منت واری ءِ ہرفنگ نا ئس ۔ دیوان اٹی چیف ایگزیکٹو آفیسر نیشنل انفارمیشن ٹیکنالوجی بورڈ، منیجنگ ڈائریکٹر نیشنل ٹیلی کمیونیکیشن کارپوریشن ، چیئرمین نادرا ، چیئرمین نیوٹیک ، چیف ایگزیکٹو آفیسر پاکستان پاورٹی ایلوویش فنڈ ، ایس ای وی پی، نیشنل بینک آف پاکستان و بینک آف خیبر نا ریجنل ہیڈز آک ہم بشخ ہلکر ۔ دیوان آن تران کرسا وزیراعظم نا خصوصی کمکار امور نوجوانان سرسہب ورناپروگرام نا اہم گام گیج یوتھ انٹرپرینیور شپ اسکیم نا ورناتے ٹی شاندار است بڈی نا بابت حساب وکتاب ءِ تالان کرے ۔ ورناک دا اسکیم نا تاریخی خیرمقدم ءِ کرینو، بیرہ اسہ ہفتہ ٹی 4لکھ 33ہزار 149 وام ہلنگ نا درخواست آن لائن ملانے ہرافتیان 86درسد نرینہ و 14درسد زالبول درخواست تسنو ۔ 77 درسد درخواست گزار تا تعلق پنجاب ، 18 درسد نا خیبر پختونخوا، 7 درسد نا سندھ ، 2درسد نا اسلام آباد و بلوچستان آزاد جموں و کشمیر و گلگت بلتستان آن اسہ درسد درخواست ملانو، 44درسد وام ہلنگ نا درخواست تروک آتا تعلق 22آن 30 سال انا وئی نا نیام اٹ ءِ ۔ اوپارے کہ 32درسد ہندن ءُ درخواست ملانو ہرا خلقت مہالو آن کاروبار کننگ ءُ و اوٹی ودکی کننگ خوارہ وخت اس کہ 68 درسددرخواست پوسکن ءُ کاروبار اس بناکننگ کن ءُ ۔ اوپارے کہ داڑان نئے بیرہ ورناک مالی وڑاٹ واکدار مریرہ بلکن ملک انا ایلو ورناتے کن ملازمت آتا وارخواہی ودی مریک ۔ اوپارے کہ میرٹ و شفافیت دا اسکیم نا خاصاءِ ، درخواست گزار تینا شناختی کارڈ نمبر، شناختی کارڈ انا جاری مننگ نا تاریخ و تینا موبائل نمبر نا کمک اٹ سرسہب ورنا پروگرام نا ویب پورٹل www.kamyabjawan.gov.pk آن تینا درخواست آتا بابت معلومداری دوئی کننگ کیرہ ۔