پبی/کھاریاں۔10فروری (اے پی پی) وزیر داخلہ چوہدری نثارعلی خان پارینے کہ خلیس آک بیرہ سیم تیان آخا بلکن ملک انا تہہ آن ہم ارے۔ اسلام نا پن ئِ کاریم اٹ اتوک آدہشت گرد آک اسلام نا پن ئِ بدنام کننگ ئُ، ننا فوج انٹیلی جنس و سیکورٹی ادارہ و پولیس اسہ ناممکن کاریم اسے ممکن کرسا نشان تسر۔ دشمن پین اومیت خلکوسس توسوسس۔ ننا ورناک اوفتا عزم آتے مش تا گواچی کریر۔ دشمن آک ہرسا سلرہ و پاکستان زندہ تابندہ سلک و شونداری ہلیک۔ او جمعہ آ داڑے نیشنل کاﺅنٹر ٹیررازم ٹریننگ سینٹر اٹی نیشنل انٹگریٹڈ کاﺅنٹر ٹیررازم کورس 9 نا گریجوایشن دود آن مہمان خاص نا حیثیت اٹ تران کریکہ۔ داوخت آ انسپکٹر جنرل ٹریننگ اینڈ اویلیوایشن لیفٹیننٹ جنرل ہدایت الرحمان ، کمانڈرون کور لیفٹیننٹ جنرل عمر فاروق درانی، کمانڈنٹ نیشنل کاﺅنٹر ٹیررازم ٹریننگ سینٹر بریگیڈیئر ریاض تون اوار بڑزکو فوجی کمامدارآک ہم ساڑی ئسر۔ وزیر داخلہ پارے کہ سینٹر نا دورہ کننگ نا سلہ خلنگ آ او کمانڈرون نا منت واری ئِ ادا کیک۔ دا سنٹر بے کچ اہمیت تخک و 2 سال مست خاص مسخت اسے نا رداٹ دادے اڈتننگا۔ آپریشن ضرب عضب نا فیصلہ آن پد طے کننگا کہ پاک فوج اتون اوار اوار پولیس و ایلو سیکورٹی ادارہ غاتا کارندہ غاتے ہم انسداد دہشت گردی نا خصوصی تربیت تننگے و کورس کرفنگے۔ سنٹر اٹی گچین تربیت تننگ انگ ئِ۔ چار ہفتہ غاتا خصوصی تربیت پورو کروک آ ورناتے مبارکبادی ایتیوہ و کنے یخین ئِ کہ ننا دا ورناک گچین تربیت دوئی کننگ آن پد عزم و حوصلہ اٹ پاکستان نا رکھ انا جنگ کننگ کن تیار ئُ۔ اوتربیت پورو کروک آ ورناتیان مخاطب مرسا پارے کہ ہراواک اٹ او لیس ئُ دشمن داڑآن محروم ئِ۔ جنگ آک بیرہ سلہہ، گولہ بارود و توپ آتے اٹ کننگ پسہ بلکن جنگ کننگ کن ایمان و جوزہ نا ہم گرج مریک و دا ہموسلہہ ئِ ہراڑآن ننا ورناک لیس و دشمن محروم ئِ۔ اوپارے کہ 1965ءنا جنگ اٹی جنگی ترانہ غاک ورناو مچ آ قوم اٹی ہراجوزہ ئِ بیدار کریر اونا یات اینو ہم است آتیٹی تازہ ئِ۔ ہرا قوم اٹی جوزہ شہیدی ساڑی مرے اودے دنیا نا ہچ ئُ طاقت اس شکست تننگ کپک۔ ہراتم است آتیٹی دشمن تے نیست و نابود کننگ ناجوزہ مرے تو نمے ہچ گہس باتننگ کپک۔ اوورناتون پارے کہ او پاکستا ن نا مجاہد و محافظ ئُ و پاکستانی ہندن ئُ قوم اسے ہرا کلمہ طیبہ نا پن آ وجود اٹی بس۔ دنیا ٹی پاکستان اسٹ انگا ملک ئِ ہرا اسلام نا پن آ اڈ ہلکونے۔ اوورناتتون پارے کہ داسہ دا ملک انا رکھ اللہ تعالیٰ آن پد نما دوٹی ئِ۔ پاکستان تینا اڈ کننگ آن ہلیس داوخت اسکان ہر کنڈآن خلیس آتیٹی تموک مس ولے قوم انا سپوت آتیا فخر ئِ ہراک ملکی سیم تا دفاع ئِ کریر و ملکی وحدت و وت واجہی آ آنچ بننگ کن ہلیتوس۔ اوپارے کہ گدرینگوک آ منسہ سال آن خلیس آک بیرہ سیم تیان آخا بلکن ملک انا تہہ آن ہم اریر۔ ننا فوج و ادارہ غاک اول تہہ نا خلیس آتون مون تننگ کن تربیت یافتہ ہلورہ، او دشمن نا دوبدو مقابلہ کننگ کن تیار کننگاسر ولے دشمن داسہ ننا تینا خلقت اٹی اودیم مرسا جلہو کیک، اوفتا نئے اصول اس ارے و نئے اقدار ئس۔
