بنجائی و صوبائی حکومت آک اواری اٹ پولیو نا مونءِ توننگ کن کوشست کننگ ءُ، ڈاکٹر ظفر مرزا

پشاور ۔ 25اکتوبر (اے پی پی) خصوصی کمکار جان جوڑی ڈاکٹر ظفر مرزا و صوبائی وزیر جان جوڑی ھشام انعام اللہ نا کماشی ٹی انسداد پولیو نا بابت دیوان اس اڈ ہلک، صوبائی محکمہ جان جوڑی نا ترجمان نا رداٹ دیوان اٹی صوبائی ڈی جی ہیلتھ ، ای او سی کوارڈنیٹر ، جہانی ادارہ جان جوڑی یونیسیف نا نمائندہ غاک ہم ساڑی ئسر، دیوان اٹی بشخ ہلوک آتے پولیو وائرس نا تالانی و پولیو کیس آتے ٹی ودکی نا تشویشناک حالیت و دا بابت مون تروک چیلنج آتیا حوال تننگا، دیوان آن تران کرسا ڈاکٹر ظفر مرزا پارے کہ پولیو نا چٹفنگ کن جنگی بنداو تیا اواری اٹ کاریم کننگ نا گرج ءِ ، اوپارے کہ پولیو نا چٹفنگ نا بابت غٹ چیلنج آتون مون تننگ کن بنجائی حکومت صوبہ غاتا پبی کمک ءِ کننگ ءِ، ڈاکٹر ظفر مرزا پارے کہ پاکستان و اوغانستان آن بیدس مچ آ دنیا ٹی پولیو چٹانے و داسہ ننے غٹ ءِ اواری اٹ پاکستان آن پولیو ءِ ماس کش کروئی ءِ، دا چرجوئی ٹی ننے غٹ ءِ سیاست آن ایڑتر مرسا کاریم کروئی مریک، ڈاکٹر ظفر پارے کہ وزیراعظم عمران خان نا کماشی ٹی انشاء اللہ پاکستان ءِ پولیو فری اس جوڑ کینہ، الس اٹی دا کلہو ءِ زیات آن زیات لس کننگ نا گرجءِ کہ او پولیو نا اِراپڑی کنفسا تینا چناتا آخبت ءِ رکھ کننگ کیرہ، اوپارے کہ پولیو مہم نا برخلاف پروپیگنڈا است ہسونی اسے ہرانا توننگ نا گرج ءِ و دابابت سول سوساءٹی و عالم دین تا کڑد بے کچ اہم ءِ ۔ اوپارے کہ پولیو نا چٹفنگ اسہ قومی ءُ کاز اسے و دامسخت نا پوروی نا کسر اٹی سیاست نا ہچ ءُ گنجائش اس اف ، اوپارے کہ دا ملک انا 37کروڑ چناتا آخبت نا سوال ءِ ۔ اوپارت کرے کہ پولیو مہم اٹی پنچ سال آن کم وئی نا ہچ ءُ چناس پولیو ویکسین آتیان محروم سلپ ۔