اسلام آباد ۔ 25اکتوبر (اے پی پی) وزیر جان جوڑی ڈاکٹر یاسمین راشد پارینے کہ میاں نواز شریف نا مرض انا تشخص مسنے بروک آ اِرٹ آن مسہ دے انا تہہ ٹی پین گچینی بننگ نا گمان ءِ ۔ نجی نیوزچینل آ دارداٹ خیال آتا درشانی ءِ کرسا اوپارے کہ نواز شریف صاحب نا جون اٹی پلیٹ لیٹس تو جوڑ مننگ ءِ ولے او بھاز زوت تباہ مریرہ ہرانا سوب آن اونا پلیٹ لیٹس کم مریک ، اوپارے کہ میاں صاحب نا ناجوڑی نا درمان اکن اودے سیٹی رائیڈ نا بناءِ کرفنگانے و اوڑتون اوار ہومو گلوبین نا انجکشن ہم اودے خلنگ انگ ءِ اومیت ءِ کہ بروک آ اِرٹ آن مسہ دے اٹی اونا طب اٹی پین گچینی بریک ۔ اسہ سوج اسے نا ورندی ٹی ڈاکٹر یاسمین راشد پارے کہ تدوک آ دے اونا میاں نواز شریف تون اوڑدہی مسوسس و اواوڑآن ہریفے کہ ہسپتال اٹی تروک آ آسراتی تیان نی است جم اُس تو میاں صاحب پارے کہ او است جم ءِ و داہیت ءِ اونا ایلم ہم پارینے ولے داکان پد (ن ) لیگ والاک انتس کہ پارہ پار ۔ اونواز شریف نا ملک آن پیشن ہِننگ نا سوج آ پارے کہ میاں صاحب ءِ ہرا ناجوڑی ءِ دا ناجوڑی نا درمان ملک اٹی ہم ارے دُن اف کہ داناجوڑی اولیکو وار مون آ بسنے، نن ہروخت داوڑنا ناجوڑی تتون مون ترسا کینہ ، داناجوڑی نا درمان بناکرینے و دانا درمان پاکستان اٹی ہم ارے ۔ صوبائی وزیر جان جوڑی مستی پارے کہ میاں صاحب ءِ پاننگانے کہ جہاز تیار ءِ نی ہراکان کہ ڈاکٹر بٹنگ انگ خواسہ تو نن ہروڑ کمک کن تیار اُن ۔
