بھارتی ڈپٹی ہائی کمشنر ءِ دفترخارجہ غا بٹنگ انگا، کنٹرول لین نا شاہ کوٹ و کھوئی رٹہ سیکٹر آتے ٹی جنگ بندی نا بے خار خلاف ورزی تا مذمت

اسلام آباد ۔ 25اکتوبر (اے پی پی) وزارت خارجہ ٹی ڈائریکٹر جنرل سویلی ایشیا و سارک ڈاکٹر محمد فیصل بھارتی ڈپٹی ہائی کمشنر گورا واہلووالیا ءِ جمعہ نادے آ دفترخارجہ غا بٹنگا و 24اکتوبر 2019ء آ کوزہ گر بھارتی فوج انا کنڈآن لین آف کنٹرول (ایل او سی) نا شاہ کوٹ و کھوئی رٹہ سیکٹر آتے ٹی جنگ بندی نا بے خار خلاف ورزی تا مذمت ءِ کرے ۔ بھارتی فوج انا بے خار سم کاری ٹی مسہ بے گناہ شاری عالم دین ولد ذوالفقار ، گل زرین ولد علم دین و سلطان ولد گل زرین سکنہ خلق لالہ، تحصیل اٹھمقام ، ضلع نیلم شہید مسر وخت اس کہ چار سال وئی نا کودک مسڑ اقراء دختر محمد آفتاب سکنہ خلق جگلپور ، تحصیل و ضلع کھوئی رٹہ بھاز ٹھپی مس ۔ کوزہ گر بھارتی فوج ایل او سی و ورکنگ باءونڈری نا پدریسہ خلاف ورزی کرسا آرٹلری ، بھلو و خودکار سلہہ غاتا کمک اٹ لس شاری آبادی ءِ شست کننگ ءِ ۔ 2017 ء ٹی بھارت 1970وار جنگ بندی نا خلاف ورزی تا ارتکاب کرے و ہمووخت آن جنگ بندی نا خلاف ورزی تا چرجوئی برجاءِ ۔ شاری آبادی ءِ دانستہ شست کننگ بے کچ قابل افسوز ، انسانی عظمت و وقار ، جہانی انسانی حق و جہانی انسانی کانود نا صریحاََ منافی ءِ ۔ بھارت نا کنڈآن جنگ بندی نا دا خلاف ورزی تیان علاقائی امن و سلامتی ءِ سنگین خطرہ مون تروک ءِ ہرانانتیجہ سٹریٹجک غلطی نا دروشم اس پیش تمنگ کیک ۔ جنگ بندی نا خلاف ورزی تا دا واقعہ غاتا جاست و پاست ءِ کرفے، بھارتی فوج ءِ جنگ بندی نا شرف نا پرمان ایتے، ایل او سی و ورکنگ باءونڈری آ اونا روح انا رداٹ امن ءِ برقرار تخے ۔ اوزور شاغا کہ اقوام متحدہ نا سلامتی کونسل نا قرارداد آتارداٹ بھارت اقوام متحدہ نا فوجی مبصرین (یو این ایم او جی آئی پی) ءِ تینا کڑد ءِ ادا کننگ نا موکل ایتے ۔