وزیر داخلہ اعجاز شاہ نا نیشنل پولیس اکیڈمی ٹی پاسنگ آءوٹ پریڈ آن تران

اسلام آباد ۔ 25جولائی (اے پی پی) وزیر داخلہ اعجاز شاہ پارینے کہ پولیس دہشت گرد آتا برخلاف اولیکو دفاعی لائن نا وڑاٹ مون آ بسنے، انصاف مفننگ نا سوب آن لس بندغ انتقام نا کنڈاکاہک ہراڑان ڈوک ودرہ، پولیس نا جوان تربیت آن حالیت آک گچین مننگ کیرہ ۔ او جمعہ نادے آ نیشنل پولیس اکیڈمی ٹی پاسنگ آءوٹ پریڈ آن تران کریکہ ۔ وزیر داخلہ پارے کہ پاکستان ءِ تہہ و پیشن نا چیلنج آک مون تروک ءُ، پولیس بیرہ ڈوہدارآتا آخا دہشت گرد آتا مقابلہ ءِ ہم کننگ ءِ، پولیس دہشت گرد آتا برخلاف اولیکو دفاعی لائن نا وڑاٹ مون آ بسنے ۔ اوپارے کہ پولیس آ بے پناہ تنقید کننگک ولے جوان تربیت آن حالیت آک گچین مننگ کیرہ، تربیت پورو کننگ آن پد ماتحت آتا تربیت ءِ ہم جوان کیر تو اسل بے سہب مفسہ ۔ اوپارے کہ پولیس امن و ایمنی نا حالیت آتے قابو کننگ نا کاریم ءِ زیات جوان چاہک، پولیس نا کنڈآن امن و ایمنی ءِ برجاتخنگ ہم انصاف ءِ ، انصاف مف تو لس بندغ انتقام نا کنڈاکاہک ہراڑان ڈوک ودرہ، انصاف اٹ کاریم ہلنگ آن نما عزت و شرف اٹ ودکی مریک ۔ وزیر داخلہ پارے کہ دا ساہدار تا آخا انسان تا راج ءِ، انصاف اٹ کاریم الیر ۔ اوپولیس نا آفیسر و ورناتیا زور شاغا کہ غٹ انسان تے خوش تخنگ ممکن اف ہنداخاطران اللہ ءِ راضی کیر ۔