وزیراعظم عمران خان نا ساہیوال واقعہ نا فیصلہ نا برخلاف اپیل دائر کننگ نا پارت

اسلام آباد ۔ 25اکتوبر (اے پی پی) وزیراعظم عمران خان ساہیوال اٹی کشت و خون نا واقعہ ٹی اوار 6پولیس کارندہ غاتا بریت آ گڑتی نا درشانی ءِ کرسا پارت کرینے کہ فیصلہ نا برخلاف اپیل دائر کننگے دا استغاثہ نا خامی تا پٹ وپول و پیدواری ءِ کننگ کن بڑزکو کہولی کمیٹی اس تقرر کننگے ۔ جمعہ نادے آ وزارت داخلہ نا کنڈآن چیف سیکرٹری پنجاب و انسپکٹر جنرل آف پولیس پنجاب ءِ نوشتہ کروک آ مراسلہ ٹی پاننگانے کہ وزیراعظم عمران خان واقعہ ٹی اوار غٹ 6کارندہ غاتا بریت آ گڑتی نا درشانی ءِ کرینے ۔ مراسلہ ٹی پاننگانے کہ استغاثہ دوبہ دار نا برخلاف مقدمہ ثابت کننگ اٹ بے سہب مسنے انتئے کہ شاہدی تیان اسٹ اس ہم واقعہ نا شہادت تتنے ۔ داڑان انصاف نا فراوانی ٹی مشکل آتا بھاز ہی قابل افسوز مثال اس قائم مسنے ۔ وزیراعظم پارت کرے کہ فیصلہ نا برخلاف اپیل دائر کننگے و پراسیکیوشن ڈیپارٹمنٹ ءِ حقی گواہ تا کمک اٹ تینا مقدمہ قائم کننگ نا زموار کرسا مظلوم آتے انصاف ترفنگے ۔ مراسلہ ٹی داہم پاننگانے کہ جاست وپاست و استغاثہ نا خامی تا جاست وپاست و اوفتا پیدواری کن اسہ بڑزکو کہول انا کمیٹی اس تقرر کننگے ۔ کمیٹی ءِ ریاست نا چندی ادارہ غاتے ٹی ساڑی غلطی و خامی تا پیدواری کروک آتا ہم بایدے شناخت ءِ کننگے ہرافتا گام گیج غیر فعال مننگ آن مشتبہ بندغ آتے فائدہ مس ۔ داوڑنا خامی تے مر کننگ و ساہیوال نا واقعہ غان زہمی بندغ آتے انصاف فراوان کننگ کن خصوصی سلاہ پیش کننگے ۔ مراسلہ ٹی پاننگانے کہ دا پرمان تا تعمیل ءِ کرسا رپورٹ ءِ وزارت داخلہ و وزیراعظم آفس ءِ مسہ دے انا تہہ ٹی پیش کننگے ۔