اسلام آباد ۔ 24اکتوبر (اے پی پی) وزیراعظم عمران خان پارینے کہ ننے اقوام عالم اٹی تینا ہندءِ دوئی کروئی ءِ و عظیم قوم اس جوڑ مروئی ءِ ہراڑکن ننے ریاست مدینہ نا اصول آتیا عمل کروئی مریک، نبی اکرم ﷺ نا حیات مبارکہ نا ہر پہلو تاریخ اٹی رکھ ءِ ہرانا پیروی ءِ کرسا نن تینا زند ءِ جوڑ کننگ کینہ، پوسکن آ ٹیکنالوجی نا دور اٹی ننے تینا ورنا چین ءِ پیشن نا دودوربیدہ یلغار آن رکھ کننگ، اسلام نا دروشم و تینا روایت و تہذیب و تمدن آن روشناس کرفنگ کن المی ءِ کہ قومی تشخص و صوفیا کرام نا تعلیمات آتے تالان کننگے ۔ پنچ شنبے نادے آ جید مشاءخ عظام نا ڈل وزیراعظم عمران خان تون اوڑدہی کرے ۔ اوڑدہی ٹی کشمیر نا ویل خاص کر وزیراعظم نا کنڈآن اقوام متحدہ نا پلیٹ فارم آ کشمیر نا حالیت آتے تالان کننگ، دین اسلام نا اصل دروشم ءِ پیش کننگ، ناموس رسالت ﷺ نا رکھ و اسلام فوبیا نا توننگ نا بابت کروک آ تاریخی تقریر، ملک اٹی ورنا چین ءِ صوفیا کرام نا تعلیمات آتیان روشناس کرفنگ نا چرجوئی ٹی وزیراعظم نا کنڈآن یونیورسٹی تیٹی سیرت چیئرز آتا ٹہیفنگ و القادر یونیورسٹی نا قیام کون آ ڈٹ ، غریب و نادار بندغ آتے کن مچ آ ملک اٹی احساس پروگرام نا رداٹ لنگر خانہ غاتا جوڑ کننگ ، اسلا م نا مون آ دننگ، اسلامی شخصیت و اسلام نا دروشم ءِ تالان کننگ کن ترکی و ملائیشیا نا کمک اٹ میڈیا ہاءوس نا جوڑ کننگ نا ڈٹ و ملکی سوگوی و شونداری کن ساڑی حکومت نا گام گیج و ملکی حالیت آتیا گپ و تران کننگا ۔ ڈل آن تران کرسا وزیراعظم عمران خان پارے کہ نبی کریم ﷺ نا حیات مبارکہ غٹ انسان تیکن مشعل راہ ءِ ہرانا پیروی ءِ کرسا نن سہی وڑاٹ پورو مسلمان و سرسہبی تا مزل آتے طے کننگ کینہ ۔ اوپارے کہ ننا نبی کریم ﷺ نا حیات مبارکہ نا ہر پہلو تاریخ اٹی رکھ ءِ ہرانا پیروی ءِ کرسا نن تینا زند آتے جوڑ کننگ کینہ ۔ اوپارے کہ جامعہ غاتے ٹی سیرت چیئرز آتا جوڑ کننگ نا مسخت دادے کہ آنحضور ﷺ نا حیات مبارکہ و اسلام نا بارواٹی جامع پٹ وپول کننگے و طالب علم و ورناچین ءِ داڑان آگاہی فراوان کننگے ۔
