کشمیری تے آزادانہ چاگڑد اٹ استصواب رائے نا حق بایدے ملے، شاہ محمود قریشی

اسلام آباد ۔ 24اکتوبر (اے پی پی) وزیر خارجہ مخدوم شاہ محمود قریشی پارینے کہ اقوام متحدہ نوآبادیات نا برخلاف و انسانی حق انا مون آ دننگ نا جہد اٹی فعال کڑد ادا کرینے، الس ءِ حق خودارادیت ترفنگ دا جہد نا ساہ ءِ، 5اگست نا بھارتی حکومت نا غیر کانودی گام گیج و بدترین پابندی تا سوب آن مقبوضہ جموں و کشمیر نا حالیت آک بے کچ خراب ءُ، جہانی برادری خاص کر اقوام متحدہ بھارتی فوج انا جبر ءِ چٹفنگ کن گام گیج کے، کشمیری تے آزادانہ چاگڑد اٹ استصواب رائے بایدے حق ملے ۔ داخیال آتا درشانیءِ او اقوام متحدہ نا قیام نا 74می سال دے انا وخت آ کرے ۔ اوپارے کہ اقوام متحدہ نا سال دے انا جشن اٹی جہانی برادری تون پاکستان ہم شریک ءِ ، تینا قیام آن اقوام متحدہ جہانی امن و سلامتی، انسانی حق و انسانی عظمت نا مون آ دننگ کن ہر اول دستہ نا کڑد ءِ ادا کرینے ۔ وزیر خارجہ پارے کہ کثیر الملکی کمکاری مدام پاکستان نا خارجہ پالیسی نا اسہ بنداوی جزو اس مسنے ۔ اقوام متحدہ تون دیرینہ شریداری نا عمل ایلو پہلو تیان بیدس اقوام متحدہ نا امن دستہ غاتے ٹی ننا غٹ آن زیات کچ اٹی بشخ ہلنگ نا دروشم اٹ پورو وڑاٹ عیاں ءِ ۔ اوپارے کہ اقوام متحدہ نوآبادیات نا برخلاف و انسانی حق انا مون آ دننگ نا جہد اٹی فعال کڑد ادا کرینے ۔ الس ءِ حق خودارادیت ترفنگ دا جہد نا گویا ساہ و اسہ بنداوی جوہر ءِ ۔ دا جہانی قدر انا ساڑی گری آن پد ہم بھارت تینا کوزہ ٹی جموں و کشمیر اٹی اودے پدریسہ نت تا کیرغ آن لتاڑنگ ءِ،اوپارے کہ 5اگست نا بھارتی حکومت نا غیر کانودی گام گیج نا رداٹ عائد کروک بدترین پابندی و قدغن تا سوب بھارت نا کوزہ ٹی جموں و کشمیر اٹی حالیت آک پین خراب و گھمبیر مسنو ۔ اوپارے کہ تنازعہ کشمیر اقوام متحدہ نا سلامتی کونسل نا ایجنڈا غا اینو ہم ایسر نا چاری ویل انا وڑاٹ ساڑی ءِ ۔ اقوام متحدہ نا سلامتی کونسل نا شانزدہ اگست آ مروک آ دیوان دا حقیقت نا پورو وڑاٹ شاہدو امین ءِ ۔ شاہ محمود قریشی پارے کہ یوم اقوام متحدہ اڈ ترسا ای جہانی برادری خاص وڑاٹ اقوام متحدہ نا سلامتی کونسل آ زور شاغیوہ کہ بھارت نا کوزہ ٹی جموں و کشمیر اٹی بھارتی کوزہ گر فوج انا مسلط کروک دہشت نا راج ءِ چٹفنگ کن گام گیج کے ۔ اقوام متحدہ نا سلامتی کونسل نا قرارداد آتا کمک اٹ تنازعہ جموں و کشمیر ءِ ایسر کرفنگے دا دا المی ہیت انا متقاضی ءِ کہ اقوام متحدہ نا چاروکی ٹی آزادانہ و بے کنڈ ہلوک چاگڑد اٹی کشمیری الس ءِ استصواب رائے نا کاریم اٹ اتنگ نا حق تننگے ۔ اوپارے کہ نن اقوام متحدہ نا منشور اٹی درج مروک بڑزکو مسخت آتا دوئی و دا ادارہ ءِ حقی وڑاٹ پین زیات بامعنی کننگ کن اقوام متحدہ تون اواری اٹ تینا کوشست آتے کن ہر وخت تیار اُن ۔