پولیو نا جہانی دے انا وخت آ پنی آ کرکٹر وسیم اکرم پولیو نا برخلاف مہم اٹی سفیر پن

اسلام آباد ۔ 24اکتوبر (اے پی پی) پولیو نا جہانی دے انا وخت آ پنی آ کرکٹر وسیم اکرم ءِ پولیو نا برخلاف مہم اٹی سفیر پن کننگانے ۔ پاکستان نا انسداد پولیو پروگرام نا قومی ایمرجنسی آپریشنز سینٹرآن جاری مروک آ بیان نار داٹ وسیم اکرم و کوآرڈنیٹر معاہدہ غا دستخط کرے ۔ داوخت آ خصوصی کمکار جان جوڑی ڈاکٹر ظفر مرزا ، کنٹری ہیڈ یونیسیف آئدہ گرمائی ملاکو و جہانی ادارہ جان جوڑی نا ڈاکٹر پلیتھا ہم ساڑی ئسر ۔ معاہدہ نا رداٹ وسیم اکرم الس اٹی پولیو ویکسین نا بارواٹی آگہی کن پروگرام تیٹی بشخ ہلیک ۔ وسیم اکرم پولیو ورکرز آتا است بڈی کن چندی پروگرام تیٹی ہم بشخ ہلیک ۔ دود آن تران کرسا ڈاکٹر ظفر مرزا پارے کہ چناتے پولیو کون آ موذی مرض آن بچفنگ حکومت نا اولیت آتے ٹی اوار ءِ ۔ راج انا غٹ مکاتب فکر بشمول مذہبی و سیاسی راہشون، استاد و ڈاکٹر چناتے دا ناجوڑی آن بچفنگ اٹ تینا کڑد ءِ ادا کیر ۔ 2لکھ 60 ہزار پولیو ورکرز پاکستان پولیو پروگرام نا اصل ہیروءُ ہرافتا سخت خواری آن ہی پاکستان زوت اسے ات ٹ پولیو آن پاک ملک اس جوڑ مریک ۔ پولیو نا سفیر وسیم اکرم پارے کہ دنیا ٹی پاکستان و اوغانستان 2ہی ملک ءُ ہراڑے پولیو وائرس ءِ ۔ غٹ چناتے پولیو وائرس آن رکھ مننگ نا حق ءِ و نن غٹ جہانی برادری تون اواری اٹ پاکستان نا چناتے دا موذی مرض آن رکھ کننگ اٹ تینا کڑد ءِ ادا کیرہ ۔ پولیو نا جہانی دے ہر سال 24اکتوبر آ اڈتننگک ۔ تانکہ پولیو ورکرآتا پولیو نابرخلاف کروک آ کوشست آتے خراج تحسین پیش کننگ مرے ۔ داسال پولیو نا جہانی دے ءِ ’’انسداد پولیو نا ہیرو‘‘ و ’’شونداری نا کسہ: مستین و ساڑی ‘‘ اتون گنڈنگانے ۔ داسال پولیو نا جہانی دے انا وخت آ انسداد پولیو ہیروتے خراج تحسین پیش کننگ انگ ءِ ۔ بیان اٹی پاننگانے کہ پولیو ورکرز آتے خراج تحسین پیش کننگ کن پاکستان انسداد پولیو پروگرام نا رداٹ صوبائی کہول آ ہم چندی پروگرام تا بست و بند کننگانے ۔