اسلام آباد ۔ 24اکتوبر (اے پی پی) وزیراعظم عمران خان پارینے کہ جموں و کشمیر نا ویل اقوام متحدہ نا سلامتی کونسل نا ایجنڈا غا ساڑی متکن آ ویل آتیان اسٹ ءِ، جموں و کشمیر نا الس جہانی برادری نا کنڈآن حق خودارادیت ترفنگ نا وعدہ نا پورو مننگ نا اینو ہم چاری ءُ ۔ اوداخیال آتا درشانی ءِ اقوام متحدہ نا جہانی دے انا وخت آ تینا کلہو اٹی کرے ۔ وزیراعظم پارے کہ اقوام متحدہ نا دے ننے داہیت انا یات ترفک کہ اقوام متحدہ نا چارٹر نا مسخت و اصول آتے کن تینا مخ تفی نا اسیجا وڑاٹ درشانی ءِ کے ۔ اوپارے کہ بنداوی انسانی حق انا مون آ دننگ و رکھ اکن نوآبادیاتی نظام نا برخلاف جہد اٹی فعال کڑد ادا کننگ کے، پاکستان ءِ داہیت آ گمر ءِ کہ اقوام متحدہ نا کنڈآن تروک آ اصول آتے برجاتخنگ کن او تینا کڑد ءِ ادا کرینے ۔ اوپارے کہ اقوام متحدہ نا انصافی و ظلم و جبر انا برخلاف اومیت نا روشنائی ءِ ولے داسکان بھاز گڑا کننگ سلوک ءِ ۔ وزیراعظم پارے کہ مقبوضہ جموں و کشمیر آنبار دنیا نا بھاز انگا علاقہ غاتے ٹی اقوام متحدہ نا چارٹر نا جہانی اصول آتا خلاف ورزی مننگ ءِ ۔ اوپارے کہ اقوام متحدہ نا سلامتی کونسل نا ایجنڈا غا متکن آ ویل آتے ٹی اوار مقبوضہ جموں و کشمیر نا حالیت ظلم و جبر و استبدادی کوزہ غاتا مثال ءِ ، جموں و کشمیر نا الس جہانی برادری نا کنڈآن کروک آ ناقابل تنسیخ حق خودارادیت نا آزادانہ کاریم اٹ اتنگ نا وعدہ نا پورو مننگ نا اینو ہم چاری ءُ ۔ اوپارے کہ پاکستان جہانی نظام نا بنداو آ جوڑ کانود نا بھلا مخ تف مننگ نا ناطہ مدام بریبری نا نظام نا اسیجا مسخت آتا دوئی کننگ کن اقوام متحدہ تون تفک ۔
