اسلام آباد ۔ 24 اکتوبر (اے پی پی) وزیر ءِ توکی کار بریفیڈئیر (ر) اعجاز احمد شاہ ءَ گوشت کہ اوگان سیم سر آنی سر ءَ بارڈر ءِ جنگ ءِ کار خیبر پختونخوا ءَ کساس سرجم کنگ بوتگ ، بلوچستان ءَ 20درسد کار بچیتگ، باڈر جنگ ءَ چہ سمگلنگ ءِ ھلاسی بیت، اسلام آباد ءَ کنٹینر وتی پاسبانی ءِ واستہ جنگ بوتگ اَنت، سی ڈی اے ءِ کوکا ءِ مٹ کنگ ءِ پیسلہ کنگ بوتگ، کلانہ آئی یک بورڈ ءِ جوڑ کنگ بیت ۔ اے ھیالانی درشانی آئی ءَ راجی اسمبلی ءِ قائمہ کمیٹی برائے توکی کار ءِ دیوان ءَ کت ۔ قائمہ کمٰٹی ءِ دیوان چیئرمین راجہ خرم شہزاد نواز ءِ سروکی ءَ پارلیمنٹ گس ءَ برجم دارگ بوت ۔ دیوان ءَ کانودی کمکار ءِ بل 2019ءِ سر ءَ چار ءُُ بچار کنگ بوت ۔ سپیشل سیکرٹری توکی کار وحید الدین ءَ کمیٹی ءَ را گوشت کہ ڈن ملک ءَ چہ وت مہ وتی کمکی کانود آں لوٹ بکن آں گڈا جیڈھ آں گوں دیم پہ دیمی کنگ کپ ایت ۔ ایندگر ملک گوشاں کہ شمے وت مہ وتی کمکی کانود ءِ اچ اتھارٹی نیست ۔ من سیکرٹری توکی کار ءِ سروکی ءَ نوکیں بل ءَ وت مہ وتی کانودی کمک ءِ جیڈھ ءِ گیواری ءِ واستہ یک اتھارٹی ءِ جوڑ کنگ ءِ شور ءُُ سلاھ داتگ ۔ قومی اسمبلی ءِ باسک عبدالقادر پٹیل ءَ گوشت کہ پٹ ءُُ پول ءِ ساھت ءَ چیر اندریں ھال آنی دیگ ءُُ زورگ ءِ لڑ ھمزور انت ایشی ءِ سر ءَ سینئر جوائنٹ سیکرٹری توکی کار اصغر علی ءَ گوشت کہ نیب چیئرمین ءِ کراّ اچ مستری نیست ۔ عبدالقادر پٹیل ءَ گوشت کہ نیب کانود آنی سر ءَ چار ءُُ بچار ھم کنگ بوھگ ءَ انت ۔ اے کانود ءِ سر ءَ نوک سر چار ءُُ بچار گرگی انت ۔ سپیشل سیکرٹری توکی کار ءَ گوشت کہ اے کانود ءِ ھوالگ ءَ ایف اے ٹی ایف ءِ ھم ضلورت انت ۔ دیوان ءَ وت مہ وتی شور ءُُ سلاھی کانود ءِ بل ءِ سر ءَ گیش چار ءُُ بچاری کمیٹی ءِ آیوکیں دیوان ءَ تاں مھتل داشت ۔ وزیر ءِ توکی کار ءَ کمیٹی ءِ باسک آناں گوشت کہ مولانا فضل الرحمان ءِ گوما گوستگیں وھد ءُُ پاس ءَ سیادی بوتگ ۔ ایشانی سک باز شرپ ءُُ ازت ءَ کناں ۔ آئی ءَ گوشت کہ اسلام آباد ءَ کنڈ ءُُ مورچہ ءِ جنگ ضلورت نہ انت بلے کنٹینر وت احتیاط ءِ واستہ جتگ اَنت ۔
