صدر مملکت ڈاکٹر عارف علوی نا جاپان نا وزیراعظم شنزوایبے تون اوڑدہی ، صدر مملکت نا جاپان نا شہنشاہ ءِ تاج پوشی آمبارکباد

ٹوکیو ۔ 23 اکتوبر (اے پی پی) صدر مملکت ڈاکٹر عارف علوی جاپان نا وزیراعظم شنزوایبے تون داڑے وزیراعظم آفس اٹی اوڑدہی کرے و جاپان اٹی ساڑی آ سمندری طوفان ہگی بیس آن مروک آ نہادی جانی نسخان تیا ڈکھ و است ہسونی نا درشانیءِ کرے و ٹھپی تا زوت جان جوڑی کن نیک است خواہی تا درشانی ءِ کرے ۔ صدر مملکت جاپان نا شہنشاہ نا تاج پوشی آ اودے مبارکبادی تس و اومیت ظاہر کرے کہ داڑان جاپان نا الس کن پین شونہالی و شونداری نا پوسکن آ دور بناکیک ۔ صدر مملکت ہڑتوم آ ملک آتا نیام اٹ تین پہ تینی تعلقداری و خاص کر زرکاری واپاری، انسانی وسیلہ غاتا شونداری و الس نا نیام اٹ رابطہ غاتا مون آ دننگ نا گرج آ زور شاغا ۔ اوپارے کہ پاکستان نا 60 درسد آبادی 30 سال اسکان نا وئی نا ورناتیا تالان ءِ وخت اس کہ جاپان اٹی آبادی کم مننگ ءِ ۔ صدر مملکت پارے کہ ہڑتوم آ ملک آتا اقتصادی فائدہ کن اوفتے کاریم اٹ اتنگ مریک ۔ صدر مملکت مقبوضہ جموں و کشمیر اٹی انسانی حق انا بگڑینگوک آ حالیت آتا ہم ذکر ءِ کرے و جاپان نا وزیراعظم ءِ پارے کہ کشمیری تا بنداوی حق انا بحالی کن بھارت آ تینا اثرورسوخ ءِ کاریم اٹ اتے ۔ جاپان نا وزیراعظم رسم تاج پوشی نا دود اٹی بشخ ہلنگ آ صدر مملکت نا منت واری ءِ ہرفے و اومیت ظاہر کرے کہ داوڑنا دورہ غاتیان پاکستان و جاپان نا نیام اٹ ہڑتوم آ کنڈآتا تعلقداری تے سوگو کننگ اٹ کمک رسینگک ۔