نواز شریف و آصف علی زرداری ءِ ہسپتال آ سرکننگ و نیب آ گدریفنگ اٹ وزیراعظم عمران خان نا ہچ ءُ کڑد اس اف، ڈاکٹر فردوس عاشق اعوان

اسلام آباد ۔ 23اکتوبر (اے پی پی) وزیراعظم نا خصوصی کمکار حوالکاری و شینکاری ڈاکٹر فردوس عاشق اعوان پارینے کہ نواز شریف و آصف زرداری ءِ ہسپتال آ سرکننگ و نیب آ گدریفنگ اٹ وزیراعظم عمران خان نا ہچ ءُ کڑد اس اف، نیب اسہ وتواجہ ءُ ادارہ سے ہراکانود نا رداٹ کاریم کننگ ءِ، ملکی کانود ہچ کس نا است خواہی نا تابع مننگ کپک، نجی ٹیلی ویژن چینل نا پروگرام اٹی گپ و تران کرسا اوپارے کہ کانود آزاد ءِ و ہچ کس نا است خواہی تا تابع مننگ کپک ۔ ڈاکٹر فردوس عاشق اعوان پارے کہ اگہ بندی اسے نا طب خراب مریک تو جیل و نیب انا ڈاکٹر آتا حتمی رائے آن پد اودے ہسپتال آ گدریفنگک ۔ اسہ سوج اسے نا ورندی ٹی ڈاکٹر فردوس عاشق اعوان پارے کہ کانود نا نا شکنجہ ءِ ہچ کس نا گرد تنگ کپننگ انگ ءِ ، کانود تینا کسر ءِ تینٹ اختیار کیک ۔ اسہ سوج اسے نا ورندی ٹی اوپارے کہ کنٹینرآتا کاریم اٹ اتنگ شاری تے لٹ بردار فورس و اسلام آباد نا کنڈالشکر کشی کروک آ ٹولہ غان رکھ کننگ کن کننگک ۔ ڈاکٹر فردوس عاشق اعوان پارے کہ الس نا جان و مال انا رکھ حکومت نا زمواری ءِ، حکومت کودک شاری تے اوفتا رحم وکرم آ الیپک ۔ پرامن برانز اوفتا حق ءِ ، ولے ہراتم او ڈنڈاہرفیر تو ولدا ریاست ءِ ہم کانود نا رداٹ گام گیج کروئی تمک ۔ اسہ سوج اسے نا ورندی ٹی او پارے کہ سیاسی حکومت مذاکرات نا کسرءِ بند کپک، مذاکرات نمے ہروڑنا جھیڑہ غان بچفک، ہراڑے مذاکرات نا درگہ غاک بند مریر ہموڑے بے چیٹی ودی مریک و بے چیٹی تا ودنگ آن پد اوڑتون مون تننگ کن پلان اس جوڑ کروئی تمک ۔ اوپارے کہ حکومت بے چیٹ و پھسات کون آ منفی سوچ انا کسر ءِ توننگ کن حرکت اٹی بریک، غٹ ادارہ غاک تینا زمواری ءِ پورو کیرہ، انتظامی معاملہ غاتا بابت آن عدالتی فیصلہ نا رداٹ دھر نہ نا ہچ ءُ حالیت اسے ٹی موکل تننگ مفک و نئے روڈ آتیا دھرنا ترسا شاری تا زند ءِ یرغمال کننگ مریک ۔ داڑان الس نا بنداوی حق انا استحصال مریک ۔